बॅडमिंटन असोसिएशन ऑफ इंडियाने मडगाव, गोवा येथील मनोहर पर्रीकर क्रीडा संकुलात नुकत्याच आयोजित केलेल्या वेटरन्स मास्टर्स राष्ट्रीय बॅडमिंटन स्पर्धेत मुंबईच्या श्वेता ठाकूर आणि पल्लवी मित्तल या दोघींनी कांस्यपदकाची कमाई केली.
३५ वर्षांवरील मिश्र दुहेरी वयोगटात श्वेता ठाकूरने अभिनव प्रकाशसोबत कांस्यपदक मिळविले. उपांत्य फेरीत केरळच्या मोहम्मद रेहान व अनिस कौसर यांच्याकडून ठाकूर, प्रकाश जोडीला पराभव पत्करावा लागला. विशेष म्हणजे या गटात रेहान, कौसर हीच जोडी विजेती ठरली. या गटात ६८ जोड्यांनी भाग घेतला होता. श्वेता ठाकूर या उज्ज्वल इंटरनॅशनल कंपनीमध्ये संचालकपदावर कार्यरत आहेत. यापूर्वी त्यांनी आग्रा येथे नुकत्याच झालेल्या अखिल भारतीय बॅडमिंटन स्पर्धेत महिला दुहेरी गटात कांस्य, तर २०२५मध्ये झालेल्या सी. सी. आय. महाराष्ट्र राज्य स्पर्धेत महिला दुहेरी गटात रौप्यपदक मिळविले होते.
३५ वर्षांवरील महिला दुहेरी गटात पल्लवी मित्तलने वरदा दीक्षितसोबत कांस्यपदक पटकावले. पल्लवी, वरदा जोडीला उपांत्य फेरीत पुण्याच्या नुपूर व प्रबिनू जोडीकडून पराभव पत्करावा लागला. या विभागात १०० जोड्यांचा सहभाग होता. पल्लवी मित्तल यांनी कनिष्ठ गटात अनेक राज्य व राष्ट्रीय स्तरावरील स्पर्धांमध्ये भाग घेतला आहे. या दोघीजणी मुंबईत अंधेरी पश्चिम येथील छत्रपती शहाजी राजे क्रीडा संकुलातील सुश्रुत करमरकर बॅडमिंटन अकॅडमीत सुश्रुत करमरकर यांच्याकडे प्रशिक्षण घेत आहेत.
