महाराष्ट्राच्या राज्यपालपदाचा अतिरिक्त कार्यभार स्वीकारण्यासाठी गुजरातचे राज्यपाल आचार्य देवव्रत यांचे आज, रविवारी मुंबईत सपत्नीक आगमन झाले. अहमदाबाद येथून तेजस एक्स्प्रेसने आलेल्या राज्यपालांचे तसेच त्यांच्या पत्नी दर्शनादेवी यांचे मुख्यमंत्री देवेंद्र फडणवीस व उपमुख्यमंत्री एकनाथ शिंदे यांनी पश्चिम रेल्वेच्या मुंबई सेंट्रल स्थानकावर पुष्पगुच्छ देऊन स्वागत केले. उपमुख्यमंत्री अजित पवार मात्र यावेळी हजर नव्हते.
राज्यपालांना मुंबई सेंट्रल रेल्वेस्थानकावर रेल्वे पोलिसांतर्फे मानवंदना देण्यात आली. राजभवन येथे पोहोचल्यावर मुंबई पोलिसांतर्फे त्यांना मानवंदना देण्यात आली. उद्या, सोमवारी सकाळी ११ वाजता राज्यपाल आचार्य देवव्रत महाराष्ट्राच्या राज्यपालपदाच्या अतिरिक्त कारभाराची शपथ घेणार आहेत. याआधीचे राज्यपाल सी. पी. राधाकृष्णन उपराष्ट्रपती झाल्यानंतर राज्यपालपदावरून पायउतार झाले.
