आनंदराव अडसूळ चॅरिटेबल ट्रस्ट, सिबिईयु व आयडियल स्पोर्ट्स अकॅडमी यांच्या संयुक्त विद्यमाने महाराष्ट्र तसेच कामगार दिनानिमित्त आजपासून सुरु होणाऱ्या विविध जिल्ह्यातील शालेय खेळाडूंच्या विनाशुल्क सांघिक सुपर लीग कॅरम स्पर्धेमधील १२ संघांची गटवारी जाहीर करण्यात आली आहे. साखळी अ गटात आनंदराव अडसूळ प्लॅटिनम, एमडीसी ज्वेलर्स, दिलीप करंगुटकर स्ट्रायकर्स; ब गटात गोविंदराव मोहिते फायटर्स, कॅ. अभिजित चँम्पियन्स, आत्माराम मोरे प्रतिष्ठान; क गटात सिबिईयु वॉरीयर्स, घोषचा फेअर प्ले, राजन राणे ऑप्टीशीयन्स आणि ड गटात सुमती क्वीन, अविनाश नलावडे स्पोर्ट्स, सुरेश आचरेकर फिनिशर्स संघांचा समावेश आहे.
शालेय प्रतिष्ठेची डीएसओ कॅरम व बुद्धिबळ स्पर्धेपर्यंत उपक्रमांचे सातत्य कायम राखण्यासाठी को-ऑप. बँक एम्प्लॉईज युनियनचे अध्यक्ष आनंदराव अडसूळ व क्रीडा संघटक गोविंदराव मोहिते यांच्या मार्गदर्शनाखाली संयोजक लीलाधर चव्हाण व प्रमोद पार्टे प्रयत्नशील आहेत. त्याअनुषंगाने जास्तीतजास्त स्पर्धात्मक सामने दर्जेदार प्रतिस्पर्ध्यांविरुद्ध शालेय खेळाडूंना सुपर लीग सांघिक कॅरम स्पर्धेद्वारे उपलब्ध करण्यावर भर दिला जाणार आहे. स्पर्धेत पोद्दार अकॅडमी-मालाडचे प्रसन्न व पुष्कर गोळे, शिर्के हायस्कूल-रत्नागिरीच्या स्वरा मोहिरे व स्वरा कदम, न्यू इंग्लिश स्कूल-जैतापूरचा आर्यन राऊत, महात्मा गांधी विद्यालयाची तनया दळवी, अँटोनियो डिसिल्व्हा हायस्कूलचा ध्रुव भालेराव, श्री नारायण गुरु हायस्कूल-चेंबूरचा उमैर पठाण, आयईएस सुळे गुरुजी शाळेची ग्रीष्मा धामणकर, आयएनजी इंग्लिश स्कूल-वसईचा श्रीशान पालवणकर, श्री महावीर जैन इंग्लिश स्कूल-कल्याणची संचिता मोहिते, शारदाश्रम विद्यामंदिरचा सोहम जाधव, पार्ले टिळक विद्यालयाचा सार्थक केरकर व अमेय जंगम, पाटकर विद्यालय-डोंबिवलीचे नील म्हात्रे, प्रसाद माने, देविका जोशी, सारा देवन आदी विविध जिल्ह्यामधील राष्ट्रीय ख्यातीच्या सबज्युनियर कॅरमपटूसह शालेय ३६ खेळाडूंचा कस लागणार आहे.
१ ते ४ मे दरम्यान दररोज सकाळच्या सत्रात मुंबईतल्या दादर-पश्चिम येथील को-ऑप. बँक एम्प्लॉईज युनियन सभागृहामध्ये ही स्पर्धा होईल. साखळी ४ गटवारीमधून प्रत्येक गटातून पहिले दोन संघ प्रीमियर सुपर लीगसाठी पात्र ठरणार आहेत. पूर्णपणे विनाशुल्क असलेल्या कॅरम उपक्रमात शालेय खेळाडूंचा चषक, प्रमाणपत्र, टी शर्ट व स्ट्रायकर आदी पुरस्कारांनी गौरव होणार आहे.
