जगातील पहिली २४ तास बातम्या देणारी वृत्तवाहिनी ‘सीएनएन’ सुरू करून टेलिव्हिजन (टिव्ही) पत्रकारितेचा चेहरामोहरा बदलणारे दिग्गज माध्यम सम्राट टेड टर्नर यांचे वयाच्या ८७व्या वर्षी नुकतेच निधन झाले. १९८०मध्ये त्यांनी ‘केबल न्यूज नेटवर्क’ची स्थापना केली, ज्याने ठराविक वेळेत बातम्या देण्याच्या प्रस्थापित पद्धतीला छेद देत अहोरात्र ‘ब्रेकिंग न्यूज’ देण्याची नवी संस्कृती रूजवली. १९९०-९१मधील आखाती युद्धाच्या थेट आणि सविस्तर कव्हरेजमुळे सीएनएनला जागतिक स्तरावर एक वेगळी ओळख प्राप्त झाली आणि टर्नर यांचे नाव जगभर पोहोचले.
एक धाडसी व्यावसायिक आणि जोखीम घेणारे व्यक्तिमत्व म्हणून ओळखल्या जाणाऱ्या टर्नर यांनी केवळ माध्यम क्षेत्रातच नव्हे, तर क्रीडा आणि नौकानयन क्षेत्रातही स्वतःचा ठसा उमटवला होता. व्यावसायिक स्पोर्ट्स क्लबची मालकी आणि स्पर्धात्मक नौकानयन संघाचे नेतृत्त्व यामुळे ते नेहमीच चर्चेत राहिले. हॉलिवूड अभिनेत्री जेन फोंडा यांच्याशी झालेला त्यांचा विवाह आणि त्यानंतर त्यांनी स्वतःला वाहून घेतलेले सामाजिक व पर्यावरणीय कार्य हे त्यांच्या बहुआयामी व्यक्तिमत्वाचे पैलू होते. त्यांच्या निधनामुळे जागतिक माध्यम विश्वातील एका धडाडीच्या पर्वाचा अस्त झाला आहे.
