नाशिकच्या शासकीय वैद्यकीय महाविद्यालयाचे अधिष्ठाता (डीन) डॉ. वेंकट गिते यांची नाशिकच्या आरोग्य विज्ञान विद्यापीठाच्या कुलगुरूपदी नियुक्ती करण्यात आली आहे. राज्यपाल तथा विद्यापीठाचे कुलपती जिष्णु देव वर्मा यांनी आज, बुधवारी डॉ. गिते यांची कुलगुरुपदावर नियुक्ती जाहीर केली. त्यांची नियुक्ती पाच वर्षांसाठी करण्यात आली आहे. ले. ज. डॉ. माधुरी कानिटकर यांचा कुलगुरूपदाचा कार्यकाळ १४ ऑक्टोबर २०२५ रोजी संपल्यामुळे हे पद रिक्त झाले होते. त्यानंतर यशवंतराव चव्हाण महाराष्ट्र मुक्त विद्यापीठाचे कुलगुरु प्रा. संजीव सोनवणे यांच्याकडे या विद्यापीठाच्या कुलगुरूपदाचा अतिरिक्त कार्यभार सोपवण्यात आला होता. आता डॉ. गिते यांच्या नियुक्तीनंतर हा पेच संपुष्टात आला आहे.
डॉ. गिते यांनी सन २००१ साली एम.एस. (शल्यचिकित्सा) आणि २०१०मध्ये डीएनबी (युरोलॉजी) पदवी प्राप्त केली आहे. त्यांनी छत्रपती संभाजीनगरच्या शासकीय वैद्यकीय महाविद्यालय व सुपरस्पेशालिटी ब्लॉक, येथे युरोलॉजी विभागाचे प्राध्यापक व विभागप्रमुख म्हणून काम केले आहे. त्याशिवाय ते नाशिकच्या शासकीय वैद्यकीय महाविद्यालयात अधिष्ठाता म्हणून कार्यरत आहेत. शासकीय व्यवस्थेत कॅडव्हर किडनी प्रत्यारोपण (Cadaver Renal Transplant) कार्यक्रम सुरू करण्यामध्ये त्यांचे मोलाचे योगदान आहे. राज्यशासनाच्या आरोग्य विभागाच्या अवयव प्रत्यारोपण कार्यक्रमाचे ते सल्लागार सदस्य आहेत. वैद्यकीय शिक्षण आणि संशोधन क्षेत्रातही डॉ. गिते यांनी उल्लेखनीय कार्य केले असून, त्यांच्या नावावर ५३ संशोधन निबंध आणि ६ पुस्तके प्रकाशित आहेत.
आरोग्य विज्ञान विद्यापीठाच्या कुलगुरूपदासाठी योग्य उमेदवाराची शिफारस करण्यासाठी राज्यपालांनी प्रा. डॉ. सी. ई. ईपन यांच्या अध्यक्षतेखाली शोध समितीची स्थापना केली होती. या समितीमध्ये वैद्यकीय शिक्षण व औषध विभागाचे सचिव धीरज कुमार आणि राष्ट्रीय मलेरिया संशोधन संस्थेचे संचालक डॉ. अनुपकुमार आर. अन्वीकर यांचा समावेश होता. समितीने शिफारस केलेल्या सर्व उमेदवारांच्या वैयक्तिक मुलाखती घेतल्यानंतर राज्यपालांनी डॉ. वेंकट गिते यांची कुलगुरूपदी नियुक्ती जाहीर केली.
