डोंबिवली (पूर्व) येथील दत्तनगर उत्कर्ष मंडळातर्फे आयोजित करण्यात आलेल्या राष्ट्रीय कॅरमपटू जान्हवी मोरे स्मृतिप्रीत्यर्थ १६ वर्षांखालील मुलां-मुलींच्या राज्यस्तरीय कॅरम स्पर्धेत अनुक्रमे कोल्हापूरच्या ओमकार वडर आणि रत्नागिरीच्या स्वरा कदमने विजेतेपदाचा मान मिळवला. शास्त्री हॉलमध्ये झालेल्या या स्पर्धेत ठाणे, मुंबई, मुंबई उपनगर, पालघर, रायगड, रत्नागिरी, सिंधुदूर्ग, पुणे, कोल्हापूर येथील १००पेक्षा जास्त कॅरमपटू सहभागी झाले होते. दोन्ही गटात प्रथम ८ क्रमांक मिळविणाऱ्या खेळाडूंना रोख रकमेची पारितोषिके, चषक, पदके देण्यात आली. एकूण १८ हजार रुपये रोख रकमेची पारितोषिके देण्यात आली.
मुलांच्या अंतिम सामन्यात कोल्हापूरच्या सुसंस्कार हायस्कूलच्या ओमकार वडरने ठाण्याच्या आय.इ.एस. चंद्रकांत पाटकर विद्यालयाच्या प्रसाद मानेचा सरळ दोन सेटमध्ये पराभव केला. तिसऱ्या क्रमांकाच्या लढतीत पुण्याच्या आर्यन वर्ल्ड स्कूलच्या आयुष गरुडने ठाण्याच्या आय. इ. एस. चंद्रकांत पाटकर विद्यालयाच्या नील म्हात्रेचा पराभव केला. मुलींच्या निर्णायक सामन्यात रत्नागिरीच्या आर. बी. शिर्के हायस्कूलघ्या स्वरा कदमने मुंबई उपनगरच्या कनोसा कॉन्व्हेंट हायस्कूलच्या वेदिका पोमेंडकरचा २ सेटमध्ये पराभव केला. तिसऱ्या क्रमांकाच्या सामन्यात मुंबई उपनगरच्या महात्मा गांधी विद्यामंदिराच्या तनया दळवीने सिंधुदूर्ग, सावंतवाडीच्या मुक्ताई अकॅडमीच्या साक्षी रामदूरकरचा पराभव केला.
विजेत्या ओमकार, स्वराला रोख रुपये ३ हजार आणि चषक देऊन गौरविण्यात आले. खासदार डॉ. श्रीकांत शिंदे, आमदार राजेश मोरे यांचे आयोजकांना मोलाचे सहकार्य मिळाले. आमदार राजेश मोरे यांच्या हस्ते स्पर्धेचे उद्घाटन करण्यात आले. माजी विश्वविजेते कॅरमपटू योगेश परदेशी, आंतरराष्ट्रीय कॅरमपटू संजय मांडे यांच्या हस्ते स्पर्धेचा बक्षिस समारंभ संपन्न झाला.
