मुंबईतल्या दादर माटुंगा कल्चरल सेंटरच्या सल्लागार सदस्या तसेच दादर वनिता समाज, या प्रतिष्ठित संस्थेच्या ज्येष्ठ सदस्या सुरेखा पुरंदरे यांचे अल्पशा आजाराने नुकतेच निधन झाले. त्या ९१ वर्षांच्या होत्या. त्यांच्या पश्चात दोन मुले, सुना, नातवंडे असा परिवार आहे. शास्त्रीय संगीतात त्या पारंगत होत्या. त्यांच्या निधनाने दादर शिवाजीपार्क व माटुंगा परिसरात शोककळा पसरली आहे.
सुरेखा यांच्या पार्थिवावर दादर स्मशानभूमीत त्यांचे ज्येष्ठ पुत्र प्रसाद पुरंदरे यांनी अग्नि दिला. यावेळी दादर- माटुंगा येथील प्रतिष्ठीत आणि इंदौर व ग्वाल्हेरच्या मान्यवर भाले व सुभेदार घराण्याचे सदस्यही उपस्थित होते. सुरेखा यांनी सामजिक कार्यात काम करताना वनिता समाजच्या महिला नाटकांतून अनेकविध भूमिका साकारल्या. त्यांनी शास्त्रीय संगीतात विशारद पदवी मिळवली होती. शास्त्रीय संगीताच्या अनेक मैफिलीही रंगवल्या होत्या. शास्त्रीय संगीतातील ख्यातनाम गायक, पंडित आप्पा जोशींच्या त्या शिष्या होत्या.
