निसर्गप्रेमी आणि अभ्यासक श्रीरंग फडके यांनी लिहिलेल्या ‘रानसावल्या’, या पुस्तकाचे प्रकाशन येत्या शनिवारी, १४ फेब्रुवारीला गोरेगाव पूर्व येथील नंदादीप विद्यालयातील डॉ. भानुबेन नानावटी कलाघर येथे होत आहे. संध्याकाळी पाच वाजता होणाऱ्या या कार्यक्रमासाठी संजय गांधी राष्ट्रीय उद्यानाच्या सहाय्यक आयुक्त पशुसंवर्धन (वन्यजीव) डॉ. विनया जंगले प्रमुख अतिथी तसेच ज्येष्ठ पर्यावरण अभ्यासक प्रा. राजेंद्र केरकर प्रमुख वक्ते म्हणून उपस्थित राहणार आहेत.
लेखक श्रीरंग फडके यांचे ‘रानसावल्या’ हे पुस्तक गोव्याच्या ब्रॉडवे प्रकाशनने प्रकाशित केले आहे. या पुस्तकास गोव्यातील ज्येष्ठ पर्यावरण अभ्यासक प्रा. राजेंद्र केरकर यांची प्रस्तावना लाभली आहे. या पुस्तकात १४ कथा/लेख/निबंध असून लेखकाच्या अनुभवावरून त्या नोंदल्या आहेत. त्यातले काही लेखकाचे स्वतःचे अनुभव असून काही ऐकलेल्या गोष्टी आहेत. काही कथा काल्पनिक असून सत्याच्या जवळ जाणाऱ्या आहेत. काही व्यक्तिचित्रे आहेत. थोडक्यात म्हणायचं झाल्यास हे निसर्गसाहित्य आहे. मराठी भाषेतल्या निसर्ग साहित्यात आजवर अनेक मातब्बर लोकांनी आपापले अनुभव, लेख, कथा लिहिल्या आहेत. त्यांचा वारसा लिखित स्वरूपात पुढे चालू ठेवण्यासाठी छोटं योगदान असावं म्हणून हे निसर्ग अनुभवांचं लिखाण वाचकांसमोर ठेवण्याचा प्रयत्न लेखकाने केला आहे.
या पुस्तकाचं मूल्य रुपये ४००/- असून प्रकाशनाच्या दिवशी प्रकाशनस्थळी वाचकांसाठी ते रुपये ३५०/- ला दिले जाईल. अधिक माहितीसाठी किंवा पुस्तकासाठी लेखक श्रीरंग फडके यांच्याशी ९९२०३९०१०९ या दूरध्वनी क्रमांकावर किंवा shreerang.kanha@gmail.com या इमेलवर संपर्क साधावा.
