केंद्रीय अर्थ मंत्रालयाच्या वित्तीय सेवा विभागाचे सचिव एम. नागराजू यांनी काल मुंबईत एलआयसीचे नवीन ग्राहक ॲप (मायएलआयसी) आणि विक्री मध्यस्थांसाठीचे (एजंट) मोबाईल ॲप (सुपर सेल्स साथी) यांचे अनावरण केले. 26 कोटींहून अधिक पॉलिसी आणि भारतातील सर्वात व्यापक विमा पदचिन्हासह एलआयसीची ॲप्स आता बदलत्या जीवन विमा बाजारपेठेतली व्याप्ती वाढवण्यासाठी, सेवेची कार्यक्षमता सुधारण्यासाठी तसेच स्पर्धात्मक दुनियेत राहण्याकरीता कार्यरत असतील. एलआयसी ऑफ इंडियाचे मुख्य कार्यकारी अधिकारी आणि व्यवस्थापकीय संचालक आर. दोराईस्वामी, व्यवस्थापकीय संचालक दिनेश पंत, रत्नाकर पटनायक, आर. चंदर आदी यावेळी उपस्थित होते.
‘मायएलआयसी’ ॲप पॉलिसी सर्व्हिसिंग, क्लेम सपोर्ट, पेमेंट्स, डॉक्युमेंटेशन आणि कस्टमर एंगेजमेंट, या सर्वांना एकाच, सहजसोप्या 360-डिग्री डिजिटल अनुभवात एकत्र आणते. हे ॲप कागदपत्रांचे काम पूर्णपणे काढून टाकण्याचा किंवा कमी करण्याचा प्रयत्न करते. पॉलिसीधारकांना त्यांच्या आर्थिक संरक्षणाच्या प्रवासाची सूत्रे स्वतःच्या हातात घेण्यास सक्षम करते. ‘सुपर सेल्स साथी’ ॲप एलआयसीच्या एजंटना विपणन दूरदृष्टी, कामगिरीचा वेध, ग्राहकांची वैशिष्ट्ये आणि पॉलिसी सर्व्हिसिंगसाठी असलेल्या डिजिटल साधनांच्या माध्यमातून अधिक कार्यक्षमतेने आणि आत्मविश्वासाने सेवा देण्यासाठी सक्षम करते.
‘मायएलआयसी’चे फायदेः
विमा पोर्टफोलिओ एकाच ठिकाणी पाहा आणि व्यवस्थापित करा
प्रीमियम त्वरित भरा
पॉलिसीच्या लाभांचा रिअल-टाइममध्ये मागोवा घ्या
पेपरलेस पॉलिसी कर्जाचा लाभ घ्या
पॉलिसी ऑनलाइन अपडेट करा
कालबाह्य झालेल्या पॉलिसी ऑनलाइन पुनरुज्जीवित करा
ऑनलाइन पॉलिसी शोधा आणि खरेदी करा
जलद, सुरक्षित आणि कागदविरहित ई-केवायसी
‘सुपर सेल्स साथी’चे फायदेः
डिजिटल विक्री साधने
पॉलिसीच्या स्थितीचा रिअल-टाइम मागोवा
फॉलो-अपसाठी स्वयंचलित स्मरणपत्रे
ग्राहकांशी एकात्मिक संवाद
ग्राहक मूल्यवृद्धीसाठी एआय-चालित सूचना
प्रवासात सादरीकरणासाठी डिजिटल सेल्स किट्स आणि उत्पादन स्पष्टीकरणे
लक्ष्य आणि कामगिरीचे निरीक्षण करण्यास मदत करणारे कामगिरी डॅशबोर्ड
