भारतीय शेअर बाजारातील दिग्गज आणि सरकारी क्षेत्रातील सर्वात मोठी विमा कंपनी असलेल्या भारतीय आयुर्विमा महामंडळाने (एलआयसी) आपल्या गुंतवणूकदारांना मोठी भेट दिली आहे. एलआयसीच्या संचालक मंडळाने एकास एक (१:१) या प्रमाणात बोनस शेअर्स देण्याच्या प्रस्तावाला मंजुरी दिली आहे. या निर्णयामुळे गुंतवणूकदारांच्या पोर्टफोलिओमधील शेअर्सची संख्या आता थेट दुप्पट होणार आहे. कंपनीने जाहीर केलेल्या १:१ बोनसचा साधा अर्थ असा की, ज्या गुंतवणूकदारांकडे एलआयसीचा १ शेअर आहे, त्यांना कंपनीकडून १ शेअर मोफत दिला जाईल. जर तुमच्याकडे एलआयसीचे १०० शेअर्स असतील, तर बोनस मिळाल्यानंतर तुमच्याकडे एकूण २०० शेअर्स होतील.
गुंतवणूकदारांना काय होणार फायदा?
- शेअर्सची संख्या वाढणार: गुंतवणुकीचे मूल्य तेच राहिले तरी शेअर्सची संख्या वाढल्यामुळे भविष्यात मिळणारा लाभांश (डिव्हीडंड) अधिक प्रमाणात मिळेल.
- लिक्विडिटी वाढणार: बोनस शेअर्समुळे बाजारात शेअरची तरलता वाढते, ज्यामुळे छोट्या गुंतवणूकदारांना शेअर्सची खरेदी-विक्री करणे सोपे जाते.
- मनोबल वाढणार: सरकारी कंपनीकडून बोनस मिळाल्यामुळे गुंतवणूकदारांचा कंपनीवरील विश्वास अधिक दृढ होतो.
शेअरच्या किमतीवर काय परिणाम होईल?
बोनस शेअर्स जाहीर झाल्यानंतर शेअरची संख्या दुप्पट होत असली, तरी शेअरची बाजारभावातील किंमत (स्टॉक प्राईज) त्याच प्रमाणात ‘ॲडजस्ट’ केली जाते. म्हणजेच, जर शेअरची किंमत ८०० रुपये असेल, तर १:१ बोनस नंतर ती तांत्रिकदृष्ट्या ४०० रुपये होईल. मात्र, दीर्घकाळात शेअर्सची संख्या जास्त असल्याने गुंतवणूकदारांना मोठ्या नफ्याची संधी असते.
रेकॉर्ड डेट आणि पुढील प्रक्रिया
एलआयसी बोर्डाने बोनसला मंजुरी दिली असली, तरी यासाठीची ‘रेकॉर्ड डेट’ कंपनी लवकरच जाहीर करेल. ज्या गुंतवणूकदारांकडे या रेकॉर्ड डेटला कंपनीचे शेअर्स असतील, केवळ तेच या बोनससाठी पात्र ठरतील.
बाजारातील तज्ज्ञांचे मत
एलआयसीकडून घेण्यात आलेला हा निर्णय गुंतवणूकदारांसाठी सकारात्मक मानला जात आहे. या बातमीनंतर शेअर बाजारात एलआयसीच्या शेअर्समध्ये मोठी हालचाल पाहायला मिळू शकते. सरकारी कंपन्या जेव्हा बोनस देतात, तेव्हा त्याचा फायदा प्रामुख्याने दीर्घकालीन गुंतवणूक करणाऱ्यांना होतो.
टीप: शेअर बाजारातील गुंतवणूक जोखमीच्या अधीन असते. कोणताही निर्णय घेण्यापूर्वी आपल्या आर्थिक सल्लागाराचा सल्ला नक्की घ्या.
