बृहन्मुंबई महानगरपालिकेच्या गुरूवारी झालेल्या सार्वत्रिक निवडणुकीत एकूण २२७ जागांपैकी ८९ जागा जिंकत भारतीय जनता पार्टी (भाजपा) सर्वाधिक प्रभावी ठरली. भाजपाने ८९ जागांवर विजय मिळवत एकूण ११,७९,२७३ मते प्राप्त केली. एकूण मतदानाच्या तुलनेत भाजपाच्या मतांचा वाटा २१.५८ टक्के असून, विजयी उमेदवारांना मिळालेल्या एकूण मतांपैकी तब्बल ४५.२२ टक्के मते भाजपाकडे गेली आहेत.
दुसऱ्या क्रमांकावर शिवसेना (उद्धव बाळासाहेब ठाकरे) राहिली. या पक्षाने ६५ जागा जिंकत ७,१७,७३६ मते मिळवली. एकूण मतदानात त्यांचा वाटा १३.१३ टक्के असून विजयी मतांपैकी २७.५२ टक्के मते या पक्षाला मिळाली. शिवसेनेने २९ जागा जिंकत २,७३,३२६ मते मिळवली. मतदानातील त्यांचा एकूण वाटा ५ टक्के असून, विजयी मतांमध्ये त्यांचा हिस्सा १०.४८ टक्के आहे. काँग्रेसने २४ जागांवर यश मिळवत २,४२,६४६ मते मिळवली. काँग्रेसचा एकूण मतदानातील वाटा ४.४४ टक्के तर विजयी मतांमध्ये ९.३१ टक्के आहे. याशिवाय ऑल इंडिया एमआयएम (मजलिस-ए-इत्तेहादुल मुस्लिमीन) या पक्षाला ८ जागा आणि ६८,०७२ मते मिळाली. महाराष्ट्र नवनिर्माण सेनेला (मनसे) ६ जागा आणि ७४,९४६ मते मिळाली. राष्ट्रवादी काँग्रेसला ३ जागा आणि २४,६९१ मते, समाजवादी पार्टीला २ जागा आणि १५,१६२ मते, राष्ट्रवादी काँग्रेस पार्टी (शरद्चंद्र पवार)ला १ जागा आणि ११,७६० मते प्राप्त झाली.
एकूण २२७ विजयी उमेदवारांना २६,०७,६१२ मते मिळाली असून, हे प्रमाण एकूण मतदानाच्या ४७.७२ टक्के इतके आहे. महत्त्वाची बाब म्हणजे संपूर्ण मुंबईत एकूण मतदान ५४,६४,४१२ इतके झाले. ११,६७७ मते बाद ठरली.
