कामगार महर्षी गं. द. आंबेकर स्मृती आंतर शालेय-कॉलेज मोफत कॅरम स्पर्धा येत्या १० ते १२ डिसेंबरदरम्यान मुंबईच्या परळ येथील आरएमएमएस वातानुकूलीत सभागृहात आयोजित करण्यात आली आहे. राष्ट्रीय मिल मजदूर संघातर्फे संस्थापक गं. द. आंबेकर यांच्या स्मृतीदिन-सप्ताहानिमित्त कामगारांच्या मुलामुलींना प्रोत्साहन देण्यासाठी आमदार सचिन अहिर यांच्या पुढाकाराने चॅम्पियन कॅरम बोर्डावर विनाशुल्क कॅरम स्पर्धा भरविण्यात येणार आहे. दोन्ही गटातील प्रत्येकी पहिल्या आठ विजेत्या-उपविजेत्यांना आकर्षक पुरस्कार दिले जाणार असल्याची माहिती राष्ट्रीय मिल मजदूर संघाचे जनरल सेक्रेटरी गोविंदराव मोहिते यांनी दिली.
आयडियल स्पोर्ट्स अकॅडमीच्या सहकार्याने होणारी ही स्पर्धा १६ वर्षांखालील शालेय गट तसेच १९ वर्षांखालील काॉलेज गट, अशा दोन गटात रंगणार आहे. नवोदित तसेच उदयोन्मुख ज्युनियर खेळाडूंना यावेळी तज्ज्ञ मंडळीकडून मोफत मार्गदर्शनही केले जाणार आहे. स्पर्धत सहभागी होणाऱ्या मुंबई बाहेरच्या डीएसओ जिल्हा पातळीवर निवड झालेल्या खेळाडूंच्या राहण्याची व्यवस्था करण्यात येणार आहे. निवृत्ती देसाई, सुनील बोरकर, बजरंग चव्हाण आदी याकरीता विशेष प्रयत्नशील आहेत. स्पर्धेत प्रवेश घेण्यासाठी संयोजक लीलाधर चव्हाण किंवा क्रीडा शिक्षक अविनाश महाडिक यांच्याशी ९००४७५४५०७ यांच्याशी संपर्क साधावा, असे आवाहन संबंधितांनी केले आहे.
