बृहन्मुंबई महानगरपालिकेतर्फे मालमत्ता करविषयक देयके करदात्यांच्या नोंदणीकृत इ-मेलवर पाठविण्याची सोय उपलब्ध करुन देण्यात येत आहे. त्यासाठी करदात्यांनी महानगरपालिकेच्या https://ptaxportal.mcgm.gov.in/CitizenPortal/ या संकेतस्थळावर जाऊन केवायसी (KYC) फॉर्ममध्ये आपली आवश्यक ती माहिती अद्ययावत करावी, असे आवाहन बृहन्मुंबई महानगरपालिका प्रशासनातर्फे करण्यात आले आहे.
बृहन्मुंबई महानगरपालिकेतर्फे मालमत्ता करदात्यांना जाहीर आवाहन करण्यात येते की, बृहन्मुंबई महानगरपालिकेच्या https://ptaxportal.mcgm.gov.in/CitizenPortal/ या संकेतस्थळावर जाऊन केवायसी (KYC) फॉर्ममध्ये आपली आवश्यक ती माहिती अद्ययावत करावी, जेणेकरुन मालमत्ता कराविषयी सूचना ई-मेल आणि लघुसंदेश अर्थात एसएमएसद्वारे अवगत करण्यात येईल. मालमत्ता कराचे देयकेसुद्धा करदात्यांच्या नोंदणीकृत ई-मेल आयडीवर उपलब्ध करुन देण्यात येणार आहे. या सुविधेसाठी केवायसी माहिती देणे अनिवार्य आहे.
या सुविधेमुळे महानगरपालिका प्रशासनासह करदात्यांनाही मोठा फायदा होणार आहे. कारण त्यांना मालमत्ता कर देयके वेळेत प्राप्त होतील. यामुळे वेळेवर करभरणा होऊन दंडाची कारवाई टाळता येईल. सोबतच महानगरपालिकेच्या विविध योजनांची माहिती नोंदणीकृत भ्रमणध्वनी क्रमांकावर लघुसंदेश (एसएमएस) द्वारे व नोंदणीकृत ई-मेलद्वारे मिळेल. भविष्यातील मालमत्ता कराविषयक योजनेची माहिती वेळेत मिळेल. त्याचप्रमाणे करदात्यांच्या मालमत्तेत झालेल्या दुरुस्तीमुळे सुधारित देयके त्वरित उपलब्ध होतील. महानगरपालिकेच्या देयकांसाठी वापरात असलेल्या कागदाचा व त्यावरील पोस्टेज, पाकिटे, फ्रॅकिंग या बाबींचा खर्च टाळता येईल. वेळ व पैसा या दोन्हींबाबत करदात्यांसह महानगरपालिकेचीही बचत होणार आहे.
