मुंबई सिटी डिस्ट्रिक्ट जिम्नॅस्टिक्स असोसिएशन आयोजित व मुंबई शारीरिक शिक्षण मंडळ, वडाळा प्रायोजित १८व्या “जिम्नॅस्टिक्स टॅलेन्ट डिस्प्ले” मिनी स्टेट स्पर्धा मोठ्या उत्साहात भारतीय क्रीडा मंदीर, वडाळा, मुंबई येथे नुकत्याच संपन्न झाल्या. ८, १०, १२, १४ व १६ वर्षांखालील वयोगटात झालेल्या मुला-मुलींच्या या स्पर्धेत मुंबई शहर, मुंबई उपनगर, ठाणे, रायगड, पालघर जिल्ह्यातील १०००पेक्षा जास्त खेळाडूंनी भाग घेतला. या जिल्ह्यांतील खेळाडूंनी “२० फ्लोअर सेट”वर आपल्या कौशल्याचे सादरीकरण करून सर्व उपस्थितांची शाबासकी मिळवली.
या स्पर्धेत जास्तीतजास्त खेळाडू सहभागी झालेल्या आय ई एस, ओरायन (दादर), अजय जिम क्लब, लोअर परळ व चिल्ड्रन्स अकॅडमी ग्रुप ऑफ स्कूल (मालाड) या संस्थांचा विशेष गौरव करण्यात आला. श्रीराज शिंदे, युवान जगताप, रुद्र धायगुडे, साईशा सिंग, गार्गी बापये व अस्मा खान-देशमुख यांनी शानदार सादरीकरण करुन सर्वांची वाहवा मिळविली. सहभागी सर्व
खेळाडूंना श्रेणी सहभाग प्रमाणपत्र, पदक देऊन गौरविण्यात आले. संजय शेटे, महासचिव, महाराष्ट्र ऑलपिक असोसिएशन, अध्यक्ष महाराष्ट्र हौशी जिम्नॅस्टिक्स संघटना, शिवछत्रपती पुरस्कारविजेते मंगेश इंगळे (खेळाडू), राहुल ससाणे (प्रशिक्षक), ऋग्वेद जोशी (खेळाडू) व डॉ. राजेंद्र ढाकणे यांच्या उपस्थितीत स्पर्धेचा उद्घाटन व बक्षीस वितरण समारंभ संपन्न झाला. यावेळी मुंबई शारीरिक शिक्षण मंडळाच्या जिमनॅस्टिक खेळाडूंनी रिद्धमिक व आर्टिस्टिक जिमनॅस्टिकची सुंदर प्रात्यक्षिके सादर करून सर्वांची मने जिंकली.
दीपक शेटे, सचिव, मुंबई शारीरिक शिक्षण मंडळ, वडाळा, डॉ. जी. के. ढोकरट, प्राचार्य, शारीरिक शिक्षण महाविद्यालय यांनी स्पर्धेला भेट दिली. जिल्हा संघटनेचे सचिव डॉ. दीपक शिंदे, खजिनदार डॉ. राजेंद्र शेळके, स्पर्धा प्रमुख देवेंद्र पाटील, डॉ. किशोर मारू, रवींद्र विसपुते, प्रकाश जावळे, प्रेमानंद नाईक व सोनाली सावंत यांनी स्पर्धा यशस्वी करण्यासाठी अथक मेहनत घेतली.
