नेपाळच्या आज सकाळी बूढी गंडकी नदीला आलेल्या महापूरामुळे गोरखा जिल्ह्याला तडाखा बसल्याचे समजते. या पुरात ३५ जण वाहून गेल्याचे वृत्त असून नेपाळ प्रशासन त्यांची माहिती गोळा करत असल्याचे सांगण्यात येत आहे. हा पूर इतका प्रचंड होता की त्यात या परिसरातले अनेक किलोमीटरचे रस्ते नदीत रूपांतरीत झाले. कित्येक घरे, त्यातले सामान, वाहने या पुरात वाहून गेली.
आज सकाळी आभाळ भरलेले असले तरी पावसाचा पत्ता नव्हता. मात्र नंतर अचानक पाऊस सुरू झाला आणि अचानक बूढी गंडकी नदीला महापूर आला. ढागफुटी झाल्यामुळे ही परिस्थिती निर्माण झाल्याचा अंदाज वर्तवली जात आहे. या पुरामुळे नेपाळच्या हायड्रो पॉवर प्रोजेक्ट साईटचे प्रचंड नुकसान झाले. गोरखा जिल्ह्यातला जगत बाझार, सलेरी बाजार पूर्णपणे वाहून गेल्याचे कळते. या पुरामुळे येथील जनतेला दीड महिन्यापूर्वी २६ ऑगस्टला नेपाळमध्ये झालेल्या महाजलप्रलयाची आठवण झाली. बूढी नदीचे पाणी पुढे त्रिशूला नदीलाच जाऊन मिळते. २६ ऑगस्टला याच त्रिशूला नदीला महापूर आला होता.
