दोन आदिवासी महिलांच्या प्रसूतीदरम्यान झालेल्या मृत्यूच्या प्रकरणावरून विरोधी पक्षांनी आरोग्यमंत्र्यांच्या कथित असमाधानकारक उत्तरानंतर राजीनामा मागत बुधवारी नागपूरला विधानसभेतून सभात्याग केला.
गडचिरोली आणि बुलढाणा येथील स्त्री रुग्णालयात प्रसूतीदरम्यान झालेल्या दोन मृत्यूंबद्दल बुलढाण्याचे आमदार संजय गायकवाड यांनी बुलढाण्याच्या स्त्री रुग्णालयात असलेल्या भ्रष्टाचाराबद्दल चोरांच्या हातीच मंत्रिमहोदयांनी चौकशी सोपवल्याचा आरोप केला. बुलढाण्यातील रुग्णालयात एक शिपाई सर्व कामांचा ठेकेदार असून गेल्या अधिवेशनात मंत्रिमहोदयांनी चौकशीची घोषणा केली, पण भ्रष्टाचारात सामील असलेल्यांकडेच चौकशी सोपवली, असा आरोप केला. त्यानंतर आरोग्यमंत्री तानाजी सावंत यांनी या दोन्ही मृत्यूंच्या संदर्भात अतिरिक्त मुख्य सचिवांच्या अध्यक्षतेखाली समिती नेमून चौकशी केली जाईल, अशी घोषणा केली.
रजनी प्रशान्त शेडमाके (वय २३, रा. शिणी, जि. गडचिरोली) आणि उज्ज्वला नरेश बुरे (वय २७, रा. मुरखळा च, ता चामोर्शी) या दोन महिलांचा प्रसूतीदरम्यान मृत्यू झाला. त्यासंदर्भातील प्रश्न प्रश्नोत्तराच्या तासात उपस्थित करण्यात आला होता. आमदार सुनील केदार, सुभाष थोटे, अस्लम शेख आणि योगेश सागर यांनी हा प्रश्न उपस्थित केला होता. या प्रकरणात हलगर्जीपणामुळे दोन्ही महिलांचा मृत्यू ओढवला आहे, असा आरोप अनेक सदस्यांनी केला.
अध्यक्ष नार्वेकर यांनी निर्देश दिले की, चौकशी समितीचा अहवाल पुढच्या अधिवेशनात सादर करावा. त्यानंतर विरोधी सदस्यांनी जागेवर उभे राहून या प्रकरणात समाधानकारक उत्तर मिळत नसल्याचा आरोप केला. आरोग्यमंत्री समाधानकारक उत्तर देत नसल्याचा आरोप करत विरोधकांनी सभात्याग केला.
