प्रसिद्ध क्रिकेटपटू भारतरत्न सचिन तेंडुलकरने काल राष्ट्रपती द्रौपदी मुर्मू यांची राष्ट्रपती भवनात सहकुटूंब भेट घेतली. यावेळी राष्ट्रपती आणि सचिन यांनी अमृत उद्यानातही फेरफटका मारला. राष्ट्रपती भवनाचा उपक्रम असलेल्या ‘राष्ट्रपती भवन विमर्श शृंखला’अंतर्गत झालेल्या चर्चेतही सचिनने भाग घेतला. क्रिकेटपटू म्हणून त्याने आपल्या प्रवासातील काही प्रेरणादायक किस्से यावेळी राष्ट्रपतींना सांगितले. या चर्चासत्राला उदयोन्मुख खेळाडू आणि विविध शाळा, महाविद्यालयांचे विद्यार्थी उपस्थित होते.
या चर्चासत्रात सचिनने एकभावनेने काम करण्याचे महत्त्व, इतरांची काळजी घेणे, दुसऱ्यांचे यश साजरे करणे, मेहनत, मानसिक व शारीरिक बळ विकसित करणे यासारखे आयुष्य घडविणारे अनेक पैलू उलगडून दाखविले. भविष्यातले कीर्तीमान खेळाडू देशातल्या दूरदूरच्या भागातून, आदिवासी समाजातून आणि फारसा विकास न झालेल्या भागातून आलेले असतील असा विश्वासही त्याने व्यक्त केला.
