मुंबई महापालिकेचा उपक्रम असलेल्या बेस्ट प्रशासनाने कंत्राटी बसेस घेण्याऐवजी स्वतःच्या मालकीच्या बसेस घ्याव्यात, अशी मागणी बेस्ट कामगार सेनेचे अध्यक्ष सुहास सामंत यांनी शिवसेनेच्या ठाकरे गटाचे नेते आदित्य ठाकरे यांची भेट घेऊन केली.
बेस्टची बससेवा अधिक लोकाभिमुख कशी करता येईल याविषयी चर्चा करण्यासाठी कामगार सेनेच्या प्रतिनिधी मंडळाने आमदार ठाकरे यांची खास भेट मातोश्री मुक्कामी घेतली होती. कंत्राटी बसेसमुळे कंत्राटदारांचा फायदा होतो. बेस्ट मात्र तोट्यात जात आहे, ही बाब निदर्शनास आणून अध्यक्ष सामंत यांनी बेस्ट उपक्रमाने सुमारे 3050 बसेस तातडीने खरेदी करण्याची गरज असल्याचे सांगितले. अर्थात ही खरेदी टप्याटप्याने केली जावी तसेच यासाठी केंद्र सरकार व राज्य सरकारने भरीव मदत करण्याची गरज असल्याचेही त्यांनी नमूद केले.
केंद्र सरकारच्या शहर वाहतुकीसाठीच्या विविध योजनांचा मुंबई शहरालाही लाभ मिळाला पाहिजे. याबरोबरच कायम कर्मचाऱ्यांची भरती, रखडलेली पदोन्नतीची कामे, वेतन कराराची थकबाकी तसेच ग्रॅज्युइटीसाठी निधी उपलब्ध करून देण्याबाबत आदित्य ठाकरे यांनी महापालिका प्रशासन व राज्य सरकारकडे पाठपुरावा करावा, अशी मागणीही प्रतिनिधी मंडळाने केली. यात संघटनेचे माजी अध्यक्ष आशिष चेंबूरकर, उमेश सारंग, गणेश शिंदे आदी उपस्थित होते.
बेस्ट वाचली पाहिजे आणि ही सेवा अधिक उत्तम करता यावी म्हणून जे जे करावे लागेल ते मी जरूर करेन, असे आश्वासन आमदार आदित्य ठाकरे यांनी यावेळी दिले.