मुंबईच्या चेंबूर येथील दि ग्रीन एकर स्कूलमध्ये नुकत्याच आयोजित करण्यात आलेल्या आंतरशालेय जंप रोप अजिंक्यपद स्पर्धेत मुलींच्या १९ वर्षांखालील गटात आशनी काळे (लोरोटो कॉन्व्हेट), योगिता सामंत (के. जे. सोमय्या कॉलेज) आणि मुलांच्या याच गटात झाकीर अन्सारी, स्वयंम कांबळे (दोघेही साधू वासवानी हायस्कूल) यांनी सुवर्णपदके जिंकली. ४×४ स्पीड रिले शर्यतीत मुलींच्या १९ वर्षांखालील गटात साधू वासवानी हायस्कूलने पहिला क्रमांक मिळवला. सुवर्णपदक विजेत्या संघात रितू शिंदे, जयानी अंबोरे, प्रिया सोनी, स्नेहा प्रजापती यांचा समावेश होता.
मुलांच्या याच गटात याच रिले शर्यतीत ऋषीकुल विद्यालय, घाटकोपर (पूर्व) यांनी अव्वल क्रमांक मिळवला. सुवर्णपदक विजेत्या ऋषीकुल विद्यालय संघात युग पटेल, मान पटेल, मान मारु, नम्रा वसंत या चौघांचा समावेश होता. स्पर्धेत पंच म्हणून अमन वर्मा, विदेश मोरे, पंकज कुमावत, ईशान पुत्रन यांनी काम पाहिले. मुंबई उपनगरातील शाळांचा सहभाग स्पर्धेत होता. स्पर्धेचा उद्घाटन समारंभ प्रसिद्ध कुस्तीपटू, पॉवरलिफ्टर खेळाडू दिक्षा दिवे, ग्रीन एकर स्कूलचे क्रीडा प्रशिक्षक कुणाल रहाते, ॲमॅच्युर जंप रोप संघटनेच्या वर्षा काळे आणि योगेश सांगळे या पदाधिकाऱ्यांच्या उपस्थितीत संपन्न झाला.
