Homeटॉप स्टोरीराज्यपाल देवव्रत यांच्या...

राज्यपाल देवव्रत यांच्या शपथविधीलाही अजितदादांची दांडी!

गुजरातचे राज्यपाल आचार्य देवव्रत यांनी आज महाराष्ट्राच्या राज्यपालपदाचा अतिरिक्त कार्यभार स्वीकारला. राजभवनातल्या दरबार हॉलमध्ये झालेल्या शपथविधी सोहळ्यात मुंबई उच्च न्यायालयाचे मुख्य न्यायमूर्ती चंद्रशेखर यांनी देवव्रत यांना महाराष्ट्राच्या राज्यपालपदाची शपथ दिली. शपथविधीनंतर मुख्य न्यायमूर्ती, मुख्यमंत्री देवेंद्र फडणवीस व उपमुख्यमंत्री एकनाथ शिंदे यांनी राज्यपालांचे पुष्पगुच्छ देऊन अभिनंदन केले. उपमुख्यमंत्री अजित पवार आजही समारंभाला अनुपस्थित होते. काल आचार्य देवव्रत तेजस एक्स्प्रेसने मुंबईत सपत्निक उतरले. तेव्हा मुंबई सेंट्रेल रेल्वेस्थानकावर मुख्यमंत्री फडणवीस तसेच उपमुख्यमंत्री शिंदे यांनी उभयतांचे स्वागत केले होते. उपमुख्यमंत्री पवार त्यावेळीही हजर राहिले नाहीत. किंबहुना ते पुण्यात विकासकामांचा आढावा घेत होते.

संस्कृत भाषेतून घेतली शपथ

राज्यपाल देवव्रत यांनी संस्कृत भाषेतून शपथ घेऊन उपस्थितांना धक्का दिला. महाराष्ट्राचे राज्यपाल सी. पी. राधाकृष्णन यांची भारताच्या उपराष्ट्रपतीपदावर निवड झाल्यामुळे हे पद रिक्त झाले होते. राष्ट्रपतींनी गुजरातचे राज्यपाल आचार्य देवव्रत यांच्याकडे महाराष्ट्राच्या राज्यपालपदाचा अतिरिक्त कार्यभार सोपवला. शपथविधी सोहळ्याला राज्यपालांच्या पत्नी दर्शनादेवी तसेच इतर कुटुंबीय, विधान परिषदेचे सभापती प्रा. राम शिंदे, विधानसभेचे अध्यक्ष राहुल नार्वेकर, विधान परिषदेच्या उपसभापती डॉ. नीलम गोऱ्हे, कौशल्य विकास मंत्री मंगल प्रभात लोढा, क्रीडा मंत्री माणिकराव कोकाटे, मुख्य सचिव राजेश कुमार, पोलीस महासंचालक रश्मी शुक्ला, अपर मुख्य सचिव (राजशिष्टाचार) मनिषा म्हैसकर, राज्यपालांचे सचिव डॉ. प्रशांत नारनवरे, उपसचिव एस. राममूर्ती व इतर वरिष्ठ अधिकारी उपस्थित होते.

सुरुवातीला मुख्य सचिव राजेश कुमार यांनी आचार्य देवव्रत यांच्या नियुक्तीसंदर्भातील राष्ट्रपती द्रौपदी मुर्मू यांनी काढलेली अधिसूचना वाचून दाखवली. कार्यक्रमाची सुरुवात राष्ट्रगीत व राज्यगीताने झाली तर सांगता राष्ट्रगीताने झाली. शपथविधीनंतर राज्यपालांना भारतीय नौदलातर्फे मानवंदना देण्यात आली. २०१९पासून आचार्य देवव्रत गुजरातचे राज्यपाल आहेत. त्यापूर्वी २०१५ ते २०१९ या कालावधीत ते हिमाचल प्रदेशचे राज्यपाल होते. १८ जानेवारी १९५९ रोजी जन्मलेले देवव्रत यांनी पदवीनंतर इतिहास आणि हिंदीत पदव्युत्तर अभ्यास केला आहे. ते बी.एड. आहेत. त्यांनी योगशास्त्रात डिप्लोमा घेतला आहे. नैसर्गिक चिकित्साशास्त्र व योगिक सायन्समध्ये त्यांना डॉक्टरेट मिळाली आहे. अध्यापन व प्रशासन क्षेत्रात त्यांना ४५ वर्षांचा अनुभव आहे. 

Continue reading

मुंबईत येत्या २० नोव्हेंबरपासून ३ दिवस रसिकांसाठी संगीताची मेजवानी

हिंदुस्थानी शास्त्रीय संगीताची समृद्ध परंपरा, सुरांची माधुरी आणि स्वरकलेचा अभिजात वारसा जपणाऱ्या मुंबईतल्या दादर माटुंगा सांस्कृतिक केंद्राच्या वतीने यंदाही वार्षिक संगीत महोत्सवाचे भव्य आयोजन करण्यात आले आहे. येत्या २० ते २२ नोव्हेंबर, या कालावधीत रंगणारा हा त्रिदिवसीय संगीत महोत्सव...

अमेरिकेचे अध्यक्ष ट्रम्प होणार व्हेटो अध्यक्ष?

अमेरिकेत नुकत्याच झालेल्या मध्यावधी निवडणुकीत अध्यक्ष डोनाल्ड ट्रम्प यांच्या रिपब्लिकन पक्षाने सपाटून मार खाल्ल्यानंतर ट्रम्प यांचे अध्यक्षपद फक्त नामधारी राहणार आहे. येत्या तीन जानेवारीपर्यंत ट्रम्प यांची सध्याची ध्येयधोरणे अस्तित्त्वात राहतील. मात्र, त्यानंतर त्यांना अमेरिकी काँग्रेस (प्रतिनिधीगृह) तसेच सिनेटमधल्या डेमॉक्रॅटिक...

दहावीतल्या निधी पावसकरचाही दुष्काळग्रस्तांना मदतीचा हात

संकटाच्या काळात मदतीचा हात पुढे करण्यासाठी वयाचे कोणतेही बंधन नसते, याचा आदर्श नुकताच मुंबईत पाहायला मिळाला. दहावीत शिकणाऱ्या निधी पावसकर या मुलीने आपल्या पिगी बँकेत साठवलेली १०,००० रुपयांची पुंजी मुख्यमंत्र्यांच्या दुष्काळ निधीसाठी नुकतीच सुपूर्द केली. 'वर्षा' या शासकीय निवासस्थानी...
Skip to content