पोप फ्रान्सिस यांच्या पार्थिवावर उद्या, शनिवारी 26 एप्रिलला अंत्यसंस्कार केले जातील. त्यानिमित्त उद्या देशभरात शासकीय दुखवटा पाळला जाईल. उद्या संपूर्ण भारतात नियमितपणे राष्ट्रध्वज फडकवला जाणाऱ्या इमारतींवरील राष्ट्रध्वज अर्ध्यावर उतरवला जाईल तसेच कोणताही अधिकृत मनोरंजनाचा कार्यक्रम आयोजित केला जाणार नाही. व्हॅटिकन सिटीत त्यांच्या पार्थिवावर अंत्यसंस्कार केले जातील. भारताचे प्रतिनिधी म्हणून राष्ट्रपती द्रौपदी मुर्मू यावेळी उपस्थित राहणार आहेत.
केंद्र सरकारने पोप फ्रान्सिस यांच्या निधनाबद्दल आदरांजली वाहण्यासाठी तीन दिवसांचा राष्ट्रीय शोक जाहीर केला. 22 आणि 23 एप्रिलला दोन दिवसांचा शोक पाळण्यात आला तसेच अंत्यसंस्काराच्या दिवशी म्हणजे उद्या एका दिवसाचा राष्ट्रीय शोक पाळला जाईल. पोप फ्रांसिस हे एकविसाव्या शतकातील पोप आहेत. ते २६६वे पोप आहेत. ते अमेरिका खंडातून निवड झालेले सर्वप्रथम आणि पोप ग्रेगरी तिसऱ्यानंतर पोपपदी येणारे युरोपाबाहेरचे पहिले पुरुष आहेत. पोप फ्रान्सिस यांचे मूळ नाव होर्हे मारियो बेर्गोलियो होते. 17 डिसेंबर 1936 रोजी त्यांचा जन्म झाला. वयाच्या 88व्या वर्षी 21 एप्रिल 2025 रोजी त्यांचे निधन झाले.
