भावना सानप (९८) हिच्या दमदार खेळीच्या बळावर यजमान स्पोर्टिंग युनियनने चौथ्या अजित घोष ट्रॉफी महिला टी-२० क्रिकेट स्पर्धेमध्ये माटुंगा जिमखान्याचा १११ धावांनी दणदणीत पराभव करुन विजयी सुरुवात केली. यजमानांनी २० षटकांत ५ बाद १८९ धावा केल्या. आज “अ” गटातील दुसऱ्या लढतीत युरोपेमने ओरिएंटल सी. सी.चा १६ धावांनी पराभव केला. सलामीच्या रिया पवारने ५८ चेंडूंमध्ये ८१ धावा फटकावल्याने युरोपेमला ४ बाद १६८ धावा करता आल्या. उत्तरादाखल ओरिएंटलने ६ बाद १५२ धावा केल्या.
मुंबई क्रिकेट असोसिएशनच्या मान्यतेने आयोजित या स्पर्धेला कल्याणदास मेमोरियल स्पोर्ट्स फाऊंडेशन आणि युरोपेम यांचे सहाय्य मिळाले आहे. भावना आणि रिया यांना त्यांच्या उत्तम कामगिरीबद्दल सामन्यातील सर्वोत्तम खेळाडूचा पुरस्कार प्रदान करण्यात आला. भावनाचे शतक जरी हुकले असले तरी तिने ६५ चेंडूत ९८ धावा फटकाविताना १६ चौकार आणि १ षटकार अशी आतषबाजी केली. स्पोर्टिंग युनियनच्या अंकिता पवार (२९) हिची भावना बरोबरची तिसऱ्या विकेटसाठी केलेली ९८ धावांची भागी महत्त्वाची ठरली. त्याआधी स्पोर्टिंग युनियनची २ बाद ३ धावा अशी खराब स्थिती होती. भारतीय क्रिकेट संघाच्या माजी खेळाडू संगीता डबीर, सुनिता कनोजिया-सिंग यांच्या हस्ते स्पर्धेचा उद्घाटन समारंभ संपन्न झाला.
संक्षिप्त धावफलक
स्पोर्टिंग युनियन- २० षटकात ५ बाद १८९ (भावना सानप ९८), अंकिता पवार (२९), दिव्या चलवाड (२०/२), वि. वि. माटुंगा जिमखाना १४.२ षटकात सर्व बाद ७८ (अनिषा कांबळे ३७, त्वचा शेट्टी ९/२, रेणिता गोरया १३/२), सामनावीर- भावना सानप
युरोपेम- २० षटकात ४ बाद १६८ (रिया पवार ८१) वि. वि. ओरिएंटल सी. सी. २० षटकात ६ बाद १५२ (निधी कोल्हे २५, सानिया जोशी ३४, सिद्धी कामटे २७, आर्या लोखंडे २९/४), सामनावीर- रिया पवार
