मुंबई शिक्षक मतदारसंघातून काँग्रेसने प्रा. प्रकाश सोनवणे याची उमेदवारी जाहीर करावी या मागणीसाठी माजी खासदार हुसेन दलवाई यांनी काल काँग्रेसचे राष्ट्रीय सरचिटणीस व प्रदेश कॉंग्रेस प्रभारी रमेश चेन्निथला यांची प्रदेश कार्यालय, टिळकभवन येथे भेट घेतली. मुंबई शिक्षक मतदारसंघाकडे काँग्रेस सातत्याने दुर्लक्ष करीत असल्याने मुंबईत काँग्रेसचे अतोनात नुकसान होत आहे. मुंबईत मोठ्या प्रमाणात काँग्रेसला मानणारा शिक्षकवर्ग असूनही काँग्रेसकडून सातत्याने मुंबई शिक्षक मतदारसंघ न लढवता दुसऱ्या पक्षाला दिला जातो. यावेळी मात्र हा मतदारसंघ काँग्रेसनेच लढवावा, अशी विनंतीही त्यांनी केली.
मुंबई शिक्षक मतदारसंघातून काँग्रेसच्या शिक्षक आघाडीचे प्रमुख प्रा. प्रकाश सोनवणे यांना यावेळी उमेदवारी देणे योग्य राहील. प्रा. सोनवणे गेल्या चाळीस वर्षांपासून मुंबईत शिक्षक संघटनेत काम करीत आहेत तसेच त्यांनी मोठ्या प्रमाणात शिक्षक मतदारसंघातून शिक्षकांची उमेदवारी नोंदवलेली आहे. प्रा. सोनवणे मुंबई कनिष्ठ महाविद्यालय संघटनेचे संस्थापक सदस्य असून महाराष्ट्रातील विनाअनुदानित
शिक्षकांना त्यांनी मोठ्या प्रमाणात न्याय मिळवून दिला आहे हे महाराष्ट्रातील सर्व शिक्षकवर्ग जाणतो. मुंबईतील डाव्या विचारसरणीच्या शिक्षक संघटनाही प्रा. प्रकाश सोनवणे यांच्या पाठीशी उभ्या राहणार आहेत. या सर्व जमेच्या बाजू धरता काँग्रेसच्या माध्यमातून सोनवणे नक्कीच निवडून येतील याची मुंबईतील शिक्षकांना खात्री आहे असे त्यांनी चेन्निथला यांना सांगितले.
प्रदेशाध्यक्ष नाना पटोले व महाआघाडीच्या नेत्यांशी चर्चा करून प्रा. सोनवणे यांची उमेदवारी जाहीर करण्यात येईल असे आश्वासन चेन्निथला यांनी दलवाई यांना दिले. यावेळी कनिष्ठ महाविद्यालय संघटनेचे नेते मुकुंद आंधळकर, माजी आमदार हुस्नबानो खलिफे, राजन भोसले शिक्षक नेते प्रकाश तायडे, मधु मोहिते, शरद कदम आदी उपस्थित होते.
