अमेरिकेचे भारतातील राजदूत सर्जिओ गोर जम्मू-काश्मीरमध्ये काय करत आहेत? ही एखाद्या गंभीर, घातक आणि भारतविरोधी कारवाईची सुरुवात तर नाही ना? यापूर्वी मार्को रुबिओ कोलकात्यात आले होते, तेव्हा कॉक्रोच जनता पार्टीच्या (CJP) निदर्शनांचा आणि FCRAविरोधी आवाजांचा अमेरिकेतूनही सूर ऐकू आला होता. आधी अमेरिकन नागरिकांना भारतातून बाहेर पडण्याचा सल्ला देणारी प्रवासविषयक सूचना जारी होते आणि त्यानंतर भारतविरोधी कारवाई सुरू होते. आता हे सर्व काही अधिकच पूर्वनियोजित आणि अंदाज बांधता येण्यासारखे वाटत आहे. त्यामुळेच सर्जिओ गोर यांचे जम्मू-काश्मीरमधल्या वावरण्याच्या भूमिकेबद्दल शंका निर्माण होत आहे.
अमेरिकेचे राजदूत सर्जिओ गोर यांनी जम्मू-काश्मीर हा भारताचा महत्त्वाचा भाग असल्याचे विधान केले आणि त्यावर सर्वजण मोठ्या उत्साहाने प्रतिक्रिया देत आहेत. काही टीव्ही वृत्तवाहिन्या तर याला पाकिस्तानला लगावलेली जोरदार चपराक म्हणून सादर करत आहेत. पण जम्मू-काश्मीर हा भारताचा अविभाज्य भाग आहे, यासाठी आपल्याला अमेरिकेच्या मान्यतेची गरज का आहे? भारताची भूमिका स्पष्ट आणि वाटाघाटीच्यापलीकडची आहे. या विषयात कोणत्याही तृतीय पक्षाच्या मध्यस्थीचा प्रश्नच नाही, हे आपण स्पष्टपणे सांगितले आहे. सर्जिओ गोर यांनी
पाकिस्तानला पाकव्याप्त जम्मू-काश्मीर (PoJK), बलुचिस्तान आणि गिलगिट-बाल्टिस्तान भारताकडे सोपवण्यास सांगितले असते, तर त्यांच्या विधानाला निश्चितच अर्थ प्राप्त झाला असता. आधी भारताची स्तुती करून त्याला खूश करायचे आणि नंतर पाकिस्तानला शांत करण्यासाठी त्याला शस्त्रे आणि आर्थिक मदत देऊन भारताची फसवणूक करायची, असा हा डाव असू शकतो.
जम्मू-काश्मीरमधील नॅशनल कॉन्फरन्स-काँग्रेस आघाडीचे मुख्यमंत्री ओमर अब्दुल्ला यांना अमेरिकेसोबत थेट राजनैतिक संबंध प्रस्थापित करायचे आहेत. केंद्र सरकार आणि नायब राज्यपालांच्या नियंत्रणाखाली असलेल्या केंद्रशासित प्रदेशातील राज्य सरकारला अमेरिकेसोबत थेट राजनैतिक संबंध प्रस्थापित करायचे आहेत. सर्जिओ गोर येथे आपला राजकीय खेळ खेळत आहेत. हे लोक केवळ सहज किंवा विनाकारण कुठेही जात नाहीत. ते भारताला पाकिस्तानविरुद्ध आणि ओमर अब्दुल्ला यांना केंद्र सरकारविरुद्ध उभे करण्याचा प्रयत्न करत आहेत. त्यांचा जम्मू-काश्मीर दौरा कोणत्याही अंतस्थ कारणाशिवाय झालेला नाही. त्यांनी दाखवलेला हा ‘सद्भावनेचा’ संकेत भारत सरकारला व्यापार कराराच्या मुद्द्यावर आपल्या बाजूने वळवण्याशी संबंधित असण्याचीही शक्यता आहे. हे लोक जसे दिसतात तसे प्रत्यक्षात नसतात. घातक राजकीय खेळी खेळण्यात आणि कुटिल डावपेच करण्यात ते अत्यंत निष्णात आहेत आणि असतात. त्यामुळे जरा जपूनच!
