भारतीय सैन्यदल, नौदल आणि वायुदलामध्ये अधिकारीपदाकरीता होणाऱ्या सर्विस सिलेक्शन बोर्ड (एसएसबी) मुलाखतीची पूर्वतयारी करून घेण्यासाठी महाराष्ट्र शासनातर्फे नाशिक रोड येथील छात्रपूर्व प्रशिक्षण केंद्रात प्रशिक्षणाचा कार्यक्रम आयोजित करण्यात आला आहे. १५ ते २४ डिसेंबर २०२५ या कालावधीत हे प्रशिक्षण होणार असून प्रशिक्षणार्थींना मोफत प्रशिक्षण, निवास व भोजनाची सोय उपलब्ध करून दिली जाणार आहे.
मुंबई शहर जिल्ह्यातील इच्छुक उमेदवारांनी या संधीचा लाभ घेण्यासाठी १० डिसेंबर २०२५ रोजी जिल्हा सैनिक कल्याण कार्यालय, मुंबई शहर येथे मुलाखतीस उपस्थित राहण्याचे आवाहन करण्यात आले आहे. उमेदवारांनी सैनिक वेलफेअर विभाग, पुणे (डीएसडब्ल्यू) यांच्या संकेतस्थळावरून एसएसबी-६४ कोर्सचे प्रवेशपत्र व परिशिष्टे डाउनलोड करून पूर्ण भरून सोबत आणणे आवश्यक आहे.
एसएसबी प्रशिक्षण कोर्ससाठी यापैकी कोणतीही एक पात्रता आवश्यक-
कम्बाईड डिफेन्स सर्विसेस एक्झामिनेशन (सीडीएसई-यूपीएससी) किंवा नॅशनल डिफेन्स अकॅडमी एक्झामिनेशन (एनडीए-यूपीएससी) परीक्षा उत्तीर्ण असणे व एसएसबी मुलाखतीसाठी पात्रता मिळालेली असणे आवश्यक आहे.
एनसीसी ‘सी’ प्रमाणपत्र ‘ए’ किंवा ‘बी’ ग्रेडसह उत्तीर्ण असणे तसेच एसएसबी या पदासाठी एनसीसी ग्रुप हेडक्वार्टरकडून शिफारस असणे आवश्यक. टेक्निकल ग्रॅज्युएट कोर्ससाठी एसएसबीसाठी मुलाखतीचे कॉललेटर असणे आवश्यक.
विद्यापीठ प्रवेश प्रणाली (यूईएस)साठी एसएसबी कॉललेटर असणे किंवा शिफारस यादीत नाव असणे आवश्यक.
अधिक माहितीसाठी- प्रभारी अधिकारी, छात्रपूर्व प्रशिक्षण केंद्र, नाशिक रोड, नाशिक यांच्याशी खालील माध्यमांतून कार्यालयीन वेळेत संपर्क साधता येईल.
ईमेल: training.pctenashik@gmail.com दूरध्वनी: 0253-2451032, व्हॉट्सअ‍ॅप: 9156073306.
