महाराष्ट्रातल्या इयत्ता 11वीच्या केंद्रीय ऑनलाईन प्रवेशप्रक्रियेअंतर्गत शैक्षणिक वर्ष 2026-27साठी नियमित कॅप फेरी-1चे वेळापत्रक जाहीर झाले आहे. माध्यमिक व उच्च माध्यमिक शिक्षण संचालनालयाने हे जाहीर केले आहे. आज, 8 मे रोजी इयत्ता दहावीचा निकाल जाहीर झाल्यानंतर विद्यार्थ्यांना प्रवेशअर्जाचा भाग-1 आणि भाग-2 भरण्याची सुविधा उपलब्ध करून देण्यात आली असून, ातापर्यंत एकूण सात लाख 74 हजार 918 विद्यार्थ्यांनी प्रवेशअर्जाचा भाग-1 भरून नोंदणी केली आहे. इयत्ता 11वी प्रवेशप्रक्रियेसाठी विद्यार्थ्यांनी https://mahafyjcadmissions.in या अधिकृत संकेतस्थळावर उपलब्ध माहिती व सूचनांनुसार ऑनलाईन अर्ज सादर करावेत, असे आवाहन शिक्षण संचालनालयाने केले आहे.
प्रवेशप्रक्रियेत तीन नियमित फेऱ्या, ओपन टू ऑल चौथी फेरी, मुलींकरीता विशेष पाचवी फेरी घेण्यात येत आहे. त्याअनुषंगाने विद्यार्थ्यांनी आपल्या प्रवेशासाठी ऑनलाईन पद्धतीने नोंदणी करावी, असे आवाहन करण्यात आले आहे. शून्य फेरीत 8 ते 20 मे या कालावधीत विद्यार्थ्यांना नोंदणी व अर्जाचा भाग 1 ऑनलाईन सादर करणे, तात्पुरती सर्वसाधारण गुणवत्तायादी प्रदर्शित करणे, हरकती/दुरुस्ती मागण्या, सर्वसाधारण गुणवत्तायादी अंतिम करणे, विविध कोट्यासाठी यादी देऊन रिक्त जागा देणे तसेच पहिल्या फेरीसाठी जागा प्रदर्शित करणे ही प्रक्रिया होईल. नियमित कॅप फेरी-1 अंतर्गत नवीन विद्यार्थ्यांची नोंदणी, भाग-1मधली दुरुस्ती तसेच भाग-2 भरण्याची प्रक्रिया 21 आणि 22 मे रोजी होईल. विद्यार्थ्यांना किमान एक आणि कमाल दहा कनिष्ठ महाविद्यालयांना पसंतीक्रम देण्याची सुविधा असेल. कॅप फेरी-1ची अलॉटमेंट प्रक्रिया 23 ते 26 मेदरम्यान होणार आहे. 26 मे रोजी प्रवेशवाटप यादी जाहीर करण्यात येईल. विद्यार्थ्यांना त्यांच्या लॉगिनद्वारे प्रवेशासाठी वाटप झालेल्या कनिष्ठ महाविद्यालयाची माहिती उपलब्ध होणार असून, एसएमएसद्वारेही संदेश पाठविले जातील.
प्रवेश निश्चित करण्यासाठी विद्यार्थ्यांनी 26 ते 28 मेदरम्यान संबंधित कनिष्ठ महाविद्यालयात उपस्थित राहून कागदपत्रांची पडताळणी व शुल्क भरण्याची प्रक्रिया पूर्ण करणे आवश्यक आहे. त्यानंतर 29 मे रोजी रिक्त जागांची माहिती प्रसिद्ध करण्यात येईल. 30 मे रोजी दुसऱ्या फेरीचे वेळापत्रक जाहीर करण्यात येईल. विद्यार्थ्यांनी प्रवेशप्रक्रियेतील माहितीसाठी अधिकृत संकेतस्थळाला भेट द्यावी, असे आवाहन शिक्षण संचालनालयामार्फत करण्यात आले आहे. प्रवेश प्रक्रियेबाबत अधिक माहितीसाठी support@mahafyjcadmissions.in या ई-मेलवर संपर्क साधता येईल. 8530955564 हा हेल्पलाईन क्रमांकावरही संपर्क करता येईल.
