राज्याच्या गुन्हे अन्वेषण विभागाचे विशेष पोलीस महानिरीक्षक संजय दराडे यांची अवघ्या 24 तासात पुन्हा बदली करण्यात आली असून आता त्यांची नेमणूक महाराष्ट्र राज्य प्रशिक्षण व खास पथके येथे विशेष पोलीस महानिरीक्षक म्हणून करण्यात आली आहे.
आज रात्री राज्याच्या गृह विभागाने काही वरिष्ठ पोलीस अधिकाऱ्यांच्या बदल्या आणि बढत्या केल्या. त्यात दराडे यांची पुन्हा बदली करण्यात आली. कालच मुंबई पोलीस दलातील विशेष शाखेचे अपर पोलीस आयुक्त दराडे यांची पुण्यात गुन्हा अन्वेषण विभागाचे विशेष पोलीस महानिरीक्षक म्हणून नेमणूक करण्यात आली होती.
पुण्याच्या गुन्हा अन्वेषण विभागाचे विशेष पोलीस महानिरीक्षक सुरेश कुमार मेकला यांची वैधमापन शास्त्र विभागाचे अपर पोलीस महासंचालक व नियंत्रक म्हणून नेमणूक करण्यात आली आहे. मुंबईतील राज्य पोलीस दलाच्या प्रशिक्षण व खास पथके विभागाचे विशेष पोलीस महानिरीक्षक राजकुमार व्हटकर यांची प्रशिक्षण व खास पथके विभागात अपर पोलीस महासंचालक म्हणून नियुक्ती करण्यात आली आहे. नाशिकच्या महाराष्ट्र पोलीस अकादमीचे संचालक राजेश कुमार यांची तेच पद उन्नत करून संचालकपदी नेमणूक करण्यात आली आहे. व्हीआयपी सुरक्षा विभागाचे विशेष पोलीस महानिरीक्षक कृष्ण प्रकाश यांची फोर्स वनचे अपर पोलीस महासंचालक म्हणून नियुक्ती करण्यात आली आहे.
गृह विभागाचे प्रधान सचिव (विशेष) संजय सक्सेना यांची कायदा आणि सुव्यवस्था विभागाचे अपर पोलीस महासंचालक म्हणून नेमणूक करण्यात आली असून प्रशासन विभागाचे अपर पोलीस महासंचालक अनुप कुमार सिंह यांची गृह विभागाचे प्रधान सचिव (विशेष) म्हणून नेमणूक करण्यात आली आहे. पदस्थापनेच्या प्रतीक्षेत असलेले निखिल गुप्ता यांची प्रशासन विभागाचे अपर पोलीस महासंचालक म्हणून नेमणूक करण्यात आली आहे. वैधमापन शास्त्र विभागाचे अपर पोलीस महासंचालक व नियंत्रक रवींद्र सिंगल यांची महामार्ग सुरक्षा विभागाचे अपर पोलीस महासंचालक म्हणून नियुक्ती करण्यात आली असून फोर्स वनचे अपर पोलीस महासंचालक सुखविंदर सिंग यांची आर्थिक गुन्हे विभागाचे अपर पोलीस महासंचालक म्हणून नियुक्ती करण्यात आली आहे.
मुंबईचे पोलीस उपायुक्त एस. टी. राठोड यांची नागपूर शहरात दक्षिण प्रादेशिक विभागाचे अपर पोलीस आयुक्त म्हणून नेमणूक करण्यात आली आहे.
