पश्चिम आशियातील युद्धाचे ढग गडद होत असताना, इराणचे परराष्ट्र मंत्री अब्बास अराघची रशियातील सेंट पीटर्सबर्ग येथे पोहोचले आहेत. या दौऱ्यात त्यांनी रशियाचे अध्यक्ष व्लादिमीर पुतिन यांच्याशी अत्यंत महत्त्वाची चर्चा केली असून, या भेटीकडे संपूर्ण जगाचे लक्ष लागले आहे. अमेरिकेसोबत सुरू असलेला तणाव निवळण्यासाठी पुतिन यांची मध्यस्थी यशस्वी ठरेल का, यावर आता युद्धाची दिशा ठरणार आहे.
इस्लामाबादमधील चर्चा का अपयशी ठरली?
इराणचे परराष्ट्र मंत्री अराघची यांनी अत्यंत गंभीर आरोप केला आहे की, अमेरिकेच्या ‘अवाजवी आणि टोकाच्या मागण्यांमुळे’ इस्लामाबादमध्ये सुरू असलेली शांतता चर्चा अपयशी ठरली आहे. इराणने मांडलेल्या प्रस्तावांवर सकारात्मक प्रतिसाद देण्याऐवजी अमेरिकेने जाचक अटी लादल्याचा दावा इराणकडून करण्यात आला आहे. यामुळे राजनैतिक मार्गाने तोडगा काढण्याचे प्रयत्न सध्या ठप्प झाले आहेत.
पुतिन यांची भूमिका ठरणार कळीची
इराण आणि रशिया यांच्यातील वाढती जवळीक अमेरिकेसाठी चिंतेचा विषय आहे. अराघची आणि पुतिन यांच्या भेटीत प्रामुख्याने दोन मुद्द्यांवर चर्चा अपेक्षित आहे-
१. अमेरिकेच्या वाढत्या धमक्यांचा सामना करण्यासाठी रशियाची लष्करी आणि राजनैतिक साथ मिळवणे.
२. पाश्चात्य देशांच्या नाकेबंदीतून बाहेर पडण्यासाठी पर्यायी मार्ग शोधणे.
जर रशियाने या प्रकरणात उघडपणे इराणची बाजू घेतली, तर हा संघर्ष केवळ दोन देशांपुरता मर्यादित न राहता त्याचे रूपांतर मोठ्या जागतिक युद्धात होण्याची शक्यता तज्ज्ञांनी व्यक्त केली आहे.
जागतिक परिणाम आणि अनिश्चितता
अमेरिकेचे अध्यक्ष डोनाल्ड ट्रम्प यांनी इराणला दिलेला अल्टिमेटम आणि आता रशियाची या प्रकरणात झालेली एन्ट्री यामुळे जागतिक शेअर बाजार आणि कच्च्या तेलाच्या किमतीत कमालीची अस्थिरता निर्माण झाली आहे. शांतता चर्चेचे दरवाजे जवळजवळ बंद झाल्याचे चित्र असल्याने, आता केवळ रशियाच्या भूमिकेकडेच संपूर्ण जगाचे डोळे लागले आहेत.
इराण-अमेरिका संघर्षात रशियाची मध्यस्थी खरोखरच युद्ध थांबवू शकेल की यामुळे तणाव अधिक वाढेल, असे तुम्हाला वाटते? करा कमेंट!
