कुस्तीचा अखाडा गाजवणारा आंतरराष्ट्रीय कुस्तीपटू, पुण्याच्या लाचलुचपत प्रतिबंधक विभागातील अप्पर पोलीस अधीक्षक विजय चौधरी यांना कुस्तीतल्या उत्कृष्ट कामगिरीसाठी ‘पोलीस महासंचालक सन्मानचिन्ह’ जाहीर करण्यात आले आहे.
राज्य पोलीस दलात विविध पदांवर काम करताना आपली वेगळी ओळख निर्माण करणार्‍या कर्तृत्त्ववान पोलिसांना महाराष्ट्र राज्याच्या पोलीस महासंचालक रश्मी शुक्ला यांनी पोलीस महासंचालक सन्मानचिन्ह, या प्रतिष्ठेचा पुरस्कार जाहीर केले आहेत. महाराष्ट्र केसरी कुस्ती स्पर्धेत हॅटट्रिक नोंदविणार्‍या विजय चौधरीने महाराष्ट्र पोलीस दलात दोनवेळा सुवर्णपदक जिंकले. तसेच २०२३ साली कॅनडा येथे झालेल्या जागतिक कुस्ती स्पर्धेत सुवर्णपदक मिळवून महाराष्ट्र पोलीस दलाचे नाव उंचावले होते.
भविष्यातील मोठ्या कुस्ती स्पर्धा तसेच आंतरराष्ट्रीय स्पर्धेत महाराष्ट्र पोलीस दलाचे नाव असेच उंचाविण्यासाठी मी अथक परिश्रम घेणार असल्याचे विजय चौधरी यांनी सांगितले. पोलीस खात्याचा प्रतिष्ठेचा पुरस्कार जाहीर झाल्यानंतर विजय चौधरींवर चोहोबाजूंनी अभिनंदनाचा वर्षाव होत असून मुुख्यमंत्री एकनाथ शिंदे, उपमुख्यमंत्री देवेंद्र फडणवीस, उपमुख्यमंत्री अजित पवार, मंत्री गिरीश महाजन यांनी त्यांचे अभिनंदन केले आहे. सध्या विजय चौधरी आपले गुरू हिंदकेसरी रोहित पटेल यांच्या मार्गदर्शनाखाली हिंदकेसरी आणि आंतरराष्ट्रीय स्पर्धेची तयारी करत आहेत.
