आयडियल स्पोर्ट्स अकॅडमीतर्फे उद्यापासून आयोजित करण्यात आलेल्या मंगला आनंदराव अडसूळ स्मृती चषक शालेय मुलामुलींच्या आणि खुल्या बुद्धीबळ स्पर्धेत मुंबई शहर-उपनगर, ठाणे, पालघर आदी जिल्ह्यांतील आंतरराष्ट्रीय फिडे गुणांकित बुद्धीबळपटूंसह १०६ खेळाडूंमध्ये चुरस असेल.
को-ऑपरेटिव्ह बँक एम्पलॉईज युनियन-मुंबई आणि युनियनचे अध्यक्ष व माजी केंद्रीय अर्थ राज्यमंत्री आनंदराव अडसूळ यांच्यावतीने विजेत्या-उपविजेत्यांना एकूण ३० रोख व ७५ चषक पुरस्कार दिले जाणार आहेत. २० व २१ जुलै दरम्यान ही स्पर्धा आरएमएमएस वातानुकूलित हॉल, परेल, मुंबई-१२ येथे रंगणार आहे.
आयडियल ग्रुप, आरएमएमएस व मुंबई शहर जिल्हा बुद्धीबळ संघटनेच्या सहकार्याने शालेय मुलामुलींची ८/१०/१२ वर्षांखालील वयोगटाची बुद्धीबळ स्पर्धा होत आहे. ही स्पर्धा खुली जलद तसेच स्विस लीग पद्धतीने होणार आहे. खुल्या व वयोगटामधील प्रत्येक फेरी १५-१५ मिनिटे अधिक ३ सेकंद इन्क्रिमेंटची राहील. संयोजकांतर्फे बुद्धीबळपट, घड्याळ आदी साहित्य पुरविण्यात येणार आहे. बुद्धीबळपटूंच्या आग्रहास्तव स्पर्धा प्रवेशअर्जाची मुदत आज, १९ जुलैपर्यंत वाढविण्यात आली असून संयोजक लीलाधर चव्हाण अथवा मुंबई शहर जिल्हा बुद्धीबळ संघटनेचे सेक्रेटरी राजाबाबू गजेंगी (व्हॉटस अॅप क्रमांक ९३२४७ १९२९९) यांच्याकडे संपर्क साधावा.
