भारती देसाई, गोपाळ लिंग यांना “ओम् कबड्डी प्रबोधिनी”ने यंदाचे आपले पुरस्कार जाहीर केले. तेहरान, इराण येथे झालेल्या आशियाई अजिंक्यपद स्पर्धेत भारतीय महिला संघाचे नेतृत्त्व करून सुवर्णपदक मिळवून देणाऱ्या सोनाली शिंगटेचादेखील यावेळी सन्मान करण्यात येईल. स्मृतीचिन्ह, शाल, श्रीफळ व पुष्पगुच्छ असे पुरस्काराचे स्वरूप असेल.
ओम् कबड्डी प्रतिवर्षी गुढी पाडव्याच्या दिवशी आपल्या वर्धापनदिनाच्या निमित्ताने ज्यांनी मुंबई, महाराष्ट्राला कबड्डीत दैदिप्यमान यश मिळवून दिले अशा खेळाडूंना सन्मानित करते. त्याचबरोबर त्यांची व त्यांच्या खेळाची नवोदितांना ओळख करून दिली जाते. यंदाचा हा २२वा वर्धापनदिन रविवारी मुंबईतल्या कित्ते भंडारी सभागृह, गोखले रोड, दादर(पश्र्चिम), येथे साजरा करण्यात आला. आमदार अजय चौधरी, सुनील शिंदे, सचिनभाऊ अहिर, महेश सावंत, माजी महापौर महादेव देवळे, भोईवाडा पोलीसठाण्याचे वरिष्ठ पोलिस निरीक्षक सचिन कदम यांच्या उपस्थितीत पुरस्कारविजेत्यांना गौरविण्यात आले.
