स्टुडंट्स एज्युकेशनल अँड कल्चरल मूव्हमेंट ऑफ लडाख ही संस्था लाइट फिडेलिटी या (लाय-फाय) तंत्रज्ञानाचा वापर करून इंटरनेट कनेक्शन असलेली पहिली संस्था बनली आहे.
एनएव्ही वायरलेस टेक्नॉलॉजीज प्रायव्हेट लिमिटेडने (नावटेक) स्थानिक विद्यार्थ्यांना शैक्षणिक मदत करण्यासाठी भारताच्या सर्वोच्च उंचीच्या ठिकाणी असलेल्या लडाख येथील शैक्षणिक संस्थेत लाय-फाय नेटवर्कची स्थापना केली आहे. या लाय-फायमुळे विद्यार्थ्यांना विविध शैक्षणिक हेतूंसाठी उपलब्ध विजेवर जलद आणि सुरक्षित इंटरनेट मिळणार आहे.
नाव वायरलेस टेक्नॉलॉजीज ही आशियातील लाय-फाय क्षेत्रातील एकमेव नोंदणीकृत कंपनी आहे. याबाबत बोलताना संबंधित संस्थेचे संस्थापक व अध्यक्ष सोनम वांगचुक म्हणाले की, आमच्या कॅम्पसमध्ये नाविन्यपूर्ण लाय-फाय तंत्रज्ञानाचा वापर करून कायमस्वरूपी इंटरनेट कनेक्टिव्हिटीची स्थापना पाहून आनंद झाला. यामुळे ऑनलाईन व्याख्याने आयोजित करण्यासाठी आणि विद्यार्थ्यांचे कौशल्य सुधारण्यासाठी संस्थेला फायदा होईल. हे तंत्रज्ञान पर्यावरणासही अनुकूल आहे.
प्रकल्पामागील हेतू स्पष्ट करताना नावटेकचे मुख्य तंत्रज्ञान अधिकारी हार्दिक सोनी म्हणाले की, भारताच्या सर्वोच्च ठिकाणी असलेल्या शैक्षणिक संस्थेत लाय-फाय तंत्रज्ञान स्थापित केल्याचा आम्हाला अभिमान आहे. आम्ही या प्रकल्पासाठी संस्थेच्या अधिकाऱ्यांशी संपर्क साधला होता आणि ते अत्यंत जलद, सुरक्षित आणि स्वस्त इंटरनेट प्रदान करण्याच्या अशा अभिनव कल्पनेने प्रभावित झाले. सोनम वांगचुक यांच्या नेतृत्त्वाखाली, आम्ही संपूर्ण लडाख कव्हर करण्यासाठी एकत्र येऊ आणि या लाय-फाय नेटवर्कची संपूर्ण परिसरात जोडणी करू.
