नुकत्याच झालेल्या लोकसभा निवडणुकीत आपल्या मुलीसाठी म्हणजेच खासदार सुप्रिया सुळेंसाठी पुणे जिल्ह्यातल्या बारामतीत घरोघरी प्रचाराला जाणाऱ्या शरद पवार यांच्या पत्नी प्रतिभा पवार आता नातू युगेंद्र यांच्या प्रचारासाठी बारामतीच्या मैदानात उतरल्या आहेत.
आज प्रतिभा पवार यांनी बारामती विधानसभा मतदारसंघात जाऊन त्यांचे नातू, राष्ट्रवादी काँग्रेसच्या शरद पवार गटाचे उमेदवार युगेंद्र पवार यांच्यासाठी घरोघर फिरून प्रचार केला. राष्ट्रवादीमध्ये फूट पडल्यानंतर लोकसभा निवडणुकीत प्रतिभा पवार यांनी पहिल्यांदाच प्रचार केला होता. राष्ट्रवादी शपच्या उमेदवार सुप्रिया सुळे यांच्या प्रचारासाठी त्या बाहेर पडल्या होत्या. या निवडणुकीत सुप्रिया सुळे यांच्या कन्या रेवतीनेही प्रचारात भाग घेतला होता. तेव्हा सुप्रिया सुळे राष्ट्रवादी काँग्रेसच्या उमेदवार, उपमुख्यमंत्री अजित पवार यांच्या पत्नी सुनेत्रा पवार यांच्याविरोधात निवडणूक रिंगणात होत्या. यावेळी विधानसभा निवडणुकीत बारामतीत अजित पवार यांच्याविरोधात त्यांचे सख्खे पुतणे युगेंद्र पवार निवडणूक लढवत आहेत.
आदित्य ठाकरेंची माहीम, जोगेश्वरीतल्या सभा रद्द
दरम्यान, महाराष्ट्र नवनिर्माण सेनेचे प्रमुख राज ठाकरे यांच्या टिकेनंतर शिवसेनेच्या ठाकरे गटाचे नेते आदित्य ठाकरे यांनी मुंबईतल्या माहीम विधानसभा मतदारसंघातली आपली आज होणारी जाहीर सभा रद्द केली आहे. या मतदारसंघातून मनसेचे नेते आणि राज ठाकरे यांचे चिरंजीव अमित ठाकरे निवडणूक लढवत आहेत. उद्धव ठाकरे यांच्या आजारपणात आपणच त्यांना नेण्यासाठी कार घेऊन गेलो होतो. आदित्य ठाकरे मागच्या विधानसभा निवडणुकीत पहिल्यांदाच निवडणूक आखाड्यात उतरले तेव्हा आपणच त्यांच्याविरोधात वरळीत उमेदवार दिला नाही. घरातल्या गोष्टींत मी राजकारण आणत नाही, असे राज ठाकरे यांनी अमित ठाकरेंच्या प्रचारासाठी घेतलेल्या जाहीर सभेत सांगितले होते.
दोन दिवसांपूर्वीपर्यंत उद्धव ठाकरे तसेच आदित्य ठाकरे माहीम विधानसभा मतदारसंघात प्रचारसभा घेणार नव्हते. आम्हाला त्याची गरज वाटत नाही. माहीम आमचेच आहे, असे उद्धव ठाकरे यांनी माध्यमांना सांगितले होते. मात्र, त्यानंतर राज ठाकरे यांनी वरळीत मनसेचे उमेदवार संदीप देशपांडे यांच्या प्रचाराकरीता जाहीर सभा घेतली आणि लगेचच माहीममध्ये ठाकरे गटाचे उमेदवार महेश सावंत यांच्या प्रचारासाठी जाहीर सभा घेण्याचे आदित्य ठाकरे यांनी जाहीर केले. मात्र, आज दुपारनंतर ही सभा रद्द करण्यात आली.
आज आदित्य ठाकरे जोगेश्वरी पूर्व विधानसभा मतदारसंघातही त्यांच्या गटाचे उमेदवार बाळा नर यांच्या प्रचारासाठी जाहीर सभा घेणार होते. ती सभाही त्यांनी ऐनवेळी रद्द केली आहे. बाळा नर, येथून एकेकाळी उद्धव ठाकरे यांच्या खास मर्जीत असलेले खासदार रविंद्र वायकर यांच्या पत्नी मनीषा वायकर यांच्याविरोधात निवडणूक लढवत आहेत. वायकर आणि उद्धव ठाकरे यांचे एकेकाळी कौटुंबिक संबंध होते. त्यामुळे आदित्य ठाकरेंनी तेथील सभा रद्द केली असावी, असे जाणकारांना वाटते.
