मुंबईला पिण्याचे पाणी पुरवणाऱ्या तलावांपैकी एक तुळशी तलाव काल मध्यरांत्रीनंतर म्हणजेच आज पहाटे ओसंडून वाहू लागला. यंदाच्या पावसाळ्यात भरुन वाहणारा बृहन्मुंबई महानगरपालिका क्षेत्रातील हा पहिलाच तलाव आहे. त्यामुळे पिण्याच्या पाण्याचा पाणीपुरवठा करणाऱ्या ७ तलावांमध्ये आता ३९.६१ टक्के जलसाठा उपलब्ध झाला आहे. मुंबई महापालिका क्षेत्रातील नागरिकांना दररोज शुद्ध पिण्याच्या पाण्याचा पुरवठा नागरिकांना केला जातो. हा पाणीपुरवठा ज्या ७ तलावांमधून केला जातो, त्यापैकी तुळशी तलाव हा आज मध्यरात्री १.२८ वाजता ओसंडून वाहू लागला आहे, अशी माहिती जल अभियंता खात्याद्वारे देण्यात आली आहे. या तलावाची कमाल पाणी साठवण ८०४.६० कोटी लीटर (८,०४६ दशलक्ष लीटर) इतकी आहे. हा तलाव संजय गांधी राष्ट्रीय अभयारण्यात असून भांडूप जलशुद्धीकरण संकुलापासून जवळच्या परिसरात आहे.
८०४ कोटी लीटर इतकी कमाल उपयुक्त जलधारण क्षमता असणारा हा तलाव गेल्या वर्षी म्हणजेच सन २०२२ व सन २०२१मध्ये १६ जुलै रोजीच भरुन वाहू लागला होता. वर्ष २०२०मध्ये २७ जुलै; वर्ष २०१९मध्ये १२ जुलै रोजी ओसंडून वाहू लागला होता. तर त्याआधीच्या वर्षी म्हणजेच वर्ष २०१८मध्ये ९ जुलै रोजी; वर्ष २०१७मध्ये १४ ऑगस्ट रोजी आणि वर्ष २०१६मध्ये १९ जुलै रोजी तुळशी तलाव ओसंडून वाहू लागला होता.
मुंबईला पाणीपुरवठा करणाऱ्या ७ धरणांची एकूण कमाल पाणी साठवण क्षमता सुमारे १,४४,७३६.३ कोटी लीटर (१४,४७,३६३ दशलक्ष लीटर) इतकी असून आज पहाटे ६.०० वाजता करण्यात आलेल्या मोजणीनुसार सर्व सातही तलावांमध्ये ५७,३३४ कोटी लिटर (५,७३,३४० दशलक्ष लीटर) इतका म्हणजेच ३९.६१ टक्के एवढा पाणीसाठा जमा झाला आहे. याबाबत तलावनिहाय आकडेवारी विचारात घ्यावयाची झाल्यास अप्पर वैतरणा तलावात ३,३६०.५० कोटी लीटर (३३ लाख ६०५ दशलक्ष लीटर) इतका पाणीसाठा आहे. मोडक-सागर तलावात ८,१२१.४ कोटी लीटर (८१ हजार २१४ दशलक्ष लीटर) इतका पाणीसाठा आहे. तर तानसा तलावात १०३०३.१ कोटी लीटर (१,०३,०३१ दशलक्ष लीटर) इतका पाणीसाठा आहे. बाळासाहेब ठाकरे मध्य वैतरणा जलाशयमध्ये (मध्य वैतरणा) ९८०९.५ कोटी लीटर (९८ हजार ९५ दशलक्ष लीटर) इतका पाणीसाठा आहे. भातसा तलावात २३,१९२ कोटी लीटर (२,३१,९२० दशलक्ष लीटर) इतका पाणीसाठा आहे. विहार तलावात १७४२.७ कोटी लीटर (१७ हजार ७२७ दशलक्ष लीटर) पाणीसाठा आहे. आज रात्री भरून वाहू लागलेल्या तुळशी तलावामध्ये पाणी साठवण क्षमतेच्या १०० टक्के अर्थात ८०४.६ कोटी लीटर (८०४६ दशलक्ष लीटर) एवढा पाणीसाठा उपलब्ध आहे.
