राज्याचे मुख्य सचिव मनू कुमार श्रीवास्तव येत्या 30 तारखेला सेवानिवृत्त होत असून त्यांच्या जागी वित्त विभागाचे अपर मुख्य सचिव मनोज सौनिक कार्यभार स्वीकारणार आहेत.
मनोज सौनिक हा कार्यभार स्वीकारताना पुढील आदेश होईपर्यंत आपल्याकडील वित्त विभागाचा कार्यभार तसेच सार्वजनिक बांधकाम विभागाचा अतिरिक्त कार्यभारही सांभाळतील. राज्य शासनाने आज याबाबतचे आदेश जारी केले.
सौनिक मूळचे बिहारचे असून ते 1987च्या तुकडीचे भारतीय प्रशासकीय सेवेतील अधिकारी आहेत. त्यांनी कलकत्ता येथील सेंट झेविअर महाविद्यालयातून राज्यशास्त्र विषयातून पदवी घेतली आहे. जवाहरलाल नेहरू विद्यापिठातून आंतरराष्ट्रीय संबंधांवर पदव्यूत्तर पदवी त्यांनी प्राप्त केली आहे. रायगड, पुणे जिल्हा परिषदेचे मुख्य कार्यकारी अधिकारी, नाशिक, धुळे येथे जिल्हाधिकारीपदी त्यांनी काम केले आहे. अमरावती विभागाचे विभागीय आयुक्तपदी काम केले आहे. याचबरोबर महाराष्ट्र राज्य शेती महामंडळाचे व्यवस्थापकीय संचालक आणि शेती स्वावलंबन अभियानाचे महासंचालक म्हणून काम केले आहे. नवी दिल्लीतील सेवा कालावधीत ऊर्जा विभाग आणि संरक्षण विभागात काम केले आहे. त्यांना वस्त्रोद्योग, अल्पसंख्यांक, गृह, परिवहन, सार्वजनिक बांधकाम अशा विभागातील कामाचा प्रदीर्घ अनुभव आहे.
मनू कुमार श्रीवास्तव राज्याचे मुख्य सेवा हक्क आयुक्त
येत्या 30 तारखेला राज्याच्या मुख्य सचिव पदावरून सेवानिवृत्त होत असलेले मनू कुमार श्रीवास्तव यांची महाराष्ट्राचे मुख्य सेवा हक्क आयुक्त या पदावर नेमणूक केली आहे. पदभार स्वीकारल्यानंतर पाच वर्षांच्या कालावधीपर्यंत किंवा वयाची 65 वर्षे पूर्ण होतील, यापैकी जे अगोदर घडेल तोपर्यंत ते या पदावर असतील.
