मुंबईतल्या सांताक्रूझ-चेंबूर जोडरस्ता प्रकल्पअंतर्गत लालबहादूर शास्त्री मार्गावर एका मार्गिकेचे काम बृहन्मुंबई महानगरपालिकेमार्फत करण्यात येत आहे. या जोडरस्त्याच्या कामात एल विभागाच्या हद्दीतील पाच बांधकामे अडथळा ठरत होती. बृहन्मुंबई महानगरपालिका, मुंबई महानगर प्रदेश विकास प्राधिकरण आणि पोलीस यांनी एकत्रित कार्यवाही करून या पाच बांधकामांचे नुकतेच निष्कासन करण्यात आले. त्यामुळे या जोडरस्त्याच्या कामाला वेग मिळणार आहे.
बृहन्मुंबई महानगरपालिकेच्या एल विभागअंतर्गत लाल बहादूर शास्त्री मार्गावर सांताक्रुझ-चेंबूर जोडरस्त्याची एक मार्गिका घाटकोपरच्या दिशेने उपलब्ध करून देण्यात येणार आहे. महानगरपालिकेच्या पूल विभागाकडून हे काम करण्यात येत आहे. लाल बहादूर शास्त्री मार्गावर मार्गिका उपलब्ध करून दिल्याने सांताक्रूझच्या दिशेने येणाऱ्या वाहनचालकांना घाटकोपरला जाण्याचा मार्ग सुलभ होणार आहे. या प्रकल्पांतर्गत अडथळा ठरणाऱ्या पाच बांधकामाच्या निष्कासनाची कारवाई करण्यासाठीचे निर्देश उपायुक्त (परिमंडळ ५) हर्षद काळे आणि एल विभागाचे सहायक आयुक्त धनाजी हेर्लेकर यांनी दिले होते. त्यानुसार पालिकेचे अभियंते, १५ कामगार, दोन जेसीबी आणि पोलीस दलाच्या मदतीने ही निष्कासन कारवाई करण्यात आली. आज (दिनांक १९ डिसेंबर २०२३) पार पडली.
