राष्ट्रवादी काँग्रेसने आपला राष्ट्रीय पक्षाचा दर्जा राखण्याच्या प्रयत्नात लक्षद्वीपमधून लोकसभा निवडणुकीसाठी उमेदवार घोषित केला आहे. राष्ट्रीय लोकशाही आघाडीतर्फे (एनडीए) राष्ट्रवादीचे युसुफ टीपी हे राष्ट्रवादीचे उमेदवार असतील.
केंद्रीय निवडणूक आयोगाने उपमुक्यमंत्री अजित पवार यांच्याककडील राष्ट्रवादी काँग्रेसला मूळ पक्ष म्हणून मान्यता दिल्यानंतर पवार यांनी राष्ट्रवादीला एनडीएचे घटक पक्ष म्हणून सहभागी केले. आता याच एनडीएकडून राष्ट्रवादी लक्षद्वीपमधून निवडणूक लढवत आहे. २०१९ साली लक्षद्वीपची ही एकमेव जागा तेव्हाच्या अखंडीत राष्ट्रवादीनेच जिंकली होती. राष्ट्रवादीचे महासचिव व केरळचे प्रदेशाध्यक्ष यांनी युसुफ यांच्या नावाचा प्रस्ताव पक्षाच्या केंद्रीय संसदीय समितीकडे पाठवला होता. पक्षाध्यक्ष अजित पवार तसेच कार्यकारी अध्यक्ष प्रफुल्ल पटेल यांच्या उपस्थितीत संसदीय मंडळाच्या बैठकीत युसुफ यांच्या नावावर शिक्कामोर्तब झाले. राष्ट्रवादीचे मुख्य राष्ट्रीय प्रवक्ते बृजमोहन श्रीवास्तव यांनी ही माहिती दिली.
