Homeडेली पल्समहाराष्ट्राच्या मुख्यमंत्री, उपमुख्यमंत्र्यांना...

महाराष्ट्राच्या मुख्यमंत्री, उपमुख्यमंत्र्यांना किंमत शून्य…

भीमाशंकर-कर्जत येथील टोरंट पॉवरच्या 3000 मेगावॅट पंप स्टोरेज प्रकल्पासाठी सुरू असलेल्या जंगलतोडीच्या पार्श्वभूमीवर महाराष्ट्र नवनिर्माण सेनेचे (मनसे) अध्यक्ष राज ठाकरे यांनी बुधवारी कर्जत पोलीस ग्राउंडवरील सभेतून सरकारवर जोरदार हल्लाबोल केला. महाराष्ट्रात काय करायचे, काय नाही, हे सगळे दिल्लीतून ठरते, असे सांगून राज यांनी वृक्षतोड आणि परिसराची दुर्दशा पाहून खंत व्यक्त केली. ते म्हणाले, “ही तोडलेली झाडे पाहून वाटले की, आपण जंगलाच्या अंतिम संस्काराला आलोय! आज जंगलतोड झाली तिथे गेलो होतो, तोडलेली लाकडं रचून ठेवली होती. ते बघताना मला वाटलं जंगलाच्या अंतिम संस्काराला आलो आहे. इतक्या वर्षांची जुनी झाडे, कोणत्या तरी गुजरात्यासाठी कापून टाकत आहेत. पक्षी घिरट्या घालत होते, आज पक्षी घिरट्या घालत आहेत, उद्या तुमच्यावर घिरट्या घालायची वेळ येणार आहे.”

महाराष्ट्र दिल्लीतून चालतोय

“केंद्राने आणि खासगी कंपनीने ठरवून तो प्रस्ताव आम्हाला दिला, हे खुद्द मुख्यमंत्र्यांनीच सांगितले आहे. महाराष्ट्रात काय करायचं, काय नाही.. हे सगळे दिल्लीमध्ये ठरते. उद्योगपती थेट दिल्लीला जाऊन मोदी-शाहांना भेटतात आणि जमीन मागतात. मुख्यमंत्री, उपमुख्यमंत्र्यांना केंद्रात बसलेल्या दोघांकडून शून्य किंमत आहे. गुजरातचे दोघे आमचा सह्याद्री पोखरणार का?”, असा सवाल त्यांनी केला.

लाडकी बहीण योजनेवर प्रहार

“माता-भगिनींना 1,500 रुपये लाडकी बहीण योजनेतून… अशा योजनांमधून तुम्हाला विकत घेतले जात आहे आणि तुमची तोंडे बंद केली जात आहेत. 30-35 टक्के जनता आणि बाकी निवडणूक आयोग आहेच.”, असे ते म्हणाले.

23 प्रकल्पांचा पर्दाफाश

राज ठाकरे म्हणाले की, “हा एकटा प्रकल्प नाही. सह्याद्रीच्या कुशीत असे 23 प्रकल्प येणार आहेत. यातले 3 केंद्राचे, बाकी 20 अदाणी, टोरंट, रिन्यू, मेगा, ग्रीनको यांचे खासगी प्रकल्प आहेत. टेंडर नाही, काही नाही, बस असेच देऊन टाकले. महाराष्ट्रात एकूण 236 वीज प्रकल्प येत आहेत, हे सगळं डेटा सेंटरसाठी बाहेरच्या लोकांसाठी चाललं आहे.”

दरम्यान, या सभेपूर्वी राज ठाकरे यांनी साय डोंगरावर जाऊन तोडलेल्या झाडांची पाहणी केली आणि आदिवासी ग्रामस्थांशी संवाद साधला.

Continue reading

मुंबईत येत्या २० नोव्हेंबरपासून ३ दिवस रसिकांसाठी संगीताची मेजवानी

हिंदुस्थानी शास्त्रीय संगीताची समृद्ध परंपरा, सुरांची माधुरी आणि स्वरकलेचा अभिजात वारसा जपणाऱ्या मुंबईतल्या दादर माटुंगा सांस्कृतिक केंद्राच्या वतीने यंदाही वार्षिक संगीत महोत्सवाचे भव्य आयोजन करण्यात आले आहे. येत्या २० ते २२ नोव्हेंबर, या कालावधीत रंगणारा हा त्रिदिवसीय संगीत महोत्सव...

अमेरिकेचे अध्यक्ष ट्रम्प होणार व्हेटो अध्यक्ष?

अमेरिकेत नुकत्याच झालेल्या मध्यावधी निवडणुकीत अध्यक्ष डोनाल्ड ट्रम्प यांच्या रिपब्लिकन पक्षाने सपाटून मार खाल्ल्यानंतर ट्रम्प यांचे अध्यक्षपद फक्त नामधारी राहणार आहे. येत्या तीन जानेवारीपर्यंत ट्रम्प यांची सध्याची ध्येयधोरणे अस्तित्त्वात राहतील. मात्र, त्यानंतर त्यांना अमेरिकी काँग्रेस (प्रतिनिधीगृह) तसेच सिनेटमधल्या डेमॉक्रॅटिक...

दहावीतल्या निधी पावसकरचाही दुष्काळग्रस्तांना मदतीचा हात

संकटाच्या काळात मदतीचा हात पुढे करण्यासाठी वयाचे कोणतेही बंधन नसते, याचा आदर्श नुकताच मुंबईत पाहायला मिळाला. दहावीत शिकणाऱ्या निधी पावसकर या मुलीने आपल्या पिगी बँकेत साठवलेली १०,००० रुपयांची पुंजी मुख्यमंत्र्यांच्या दुष्काळ निधीसाठी नुकतीच सुपूर्द केली. 'वर्षा' या शासकीय निवासस्थानी...
Skip to content