मुंबईच्या दादर माटुंगा सांस्कृतिक केंद्रातर्फे दिवंगत मधुकर, मनमोहन आठल्ये आणि एस. एम. गोडबोले यांच्या स्मृतीप्रित्यर्थ शनिवार दि. २१ ऑक्टोबर २०२३ रोजी संध्याकाळी ५ वाजता ‘युवा महोत्सव’ आयोजित केला आहे. यात प्राजक्ता काकतकर आणि शिवानी मिरजकर यांच्या शास्त्रीय संगीताचा कार्यक्रम केंद्राच्या गोखले सभागृहात सादर करण्यात येणार आहे.
प्राजक्ता काकतकर या जयपूर अत्रौली घराण्याच्या प्रतिमा टिळक यांच्या शिष्या आहेत. त्यांनी संगीत या विषयात एम. ए. केले असून संगीत विशारद ही पदवीही प्राप्त केली आहे. काही संगीत संमेलनांमध्ये कार्यक्रम सादर केले आहेत. त्यांना तबल्याची साथ प्रसाद काकतकर आणि संवादिनीची साथ अभिजीत काकतकर करतील.
शिवानी मिरजकर या पं. चंद्रशेखर पुराणिकमठ (ग्वाल्हेर / किराणा घराणे), पं. कैवल्यकुमार गुरव (किराणा घराणे) आणि पद्मश्री पं. उल्हास कशाळकर (ग्वाल्हेर / जयपूर / आग्रा घराणे) यांच्या शिष्या आहेत. त्यांनी संगीत विषयात बी.ए., एम.ए. या पदव्या प्राप्त केल्या असून सध्या म्युझिकॉलॉजीमध्ये पीएच.डी. करीत आहेत. त्यांना अनेक पुरस्कार प्राप्त झालेले असून देशभरात विविध प्रतिष्ठित मैफलींमध्ये त्यांचे गायन झाले आहे. त्यांना तबल्याची साथ विनय मुंढे आणि संवादिनीची साथ अभिनय रवंदे करणार आहेत. अधिकाधिक रसिकांनी या कार्यक्रमाचा आनंद घ्यावा, असे आवाहन केंद्राच्या वतीने करण्यात आले आहे.
