आमचा धर्म आम्हाला कोणासमोरही झुकण्यास मान्यता देत नाही. आम्ही आमच्या आईपुढेदेखील माथा झुकवत नाही. त्यामुळे आम्ही वंदे मातरम् म्हणणार नाही, अशी ठाम भूमिका समाजवादी पक्षाचे सदस्य अबू आझमी यांनी आज विधानसभेत मांडल्यामुळे सभागृहात प्रचंड गदारोळ झाला. त्यामुळे सभागृहाचे कामकाज दहा मिनिटांसाठी तहकूब करावे लागले.
औरंगाबादमध्ये घडलेल्या घटनेवर अबू आझमी यांनी लक्षवेधी सूचना मांडली होती. आफताब पूनावला याने एक मोठे कांड केले. एका मुलीच्या मृतदेहाचे तुकडे करून ते फ्रिजमध्ये ठेवले. यातून संपूर्ण देशात मुसलमान विरोधात वातावरण पेटले. महाराष्ट्रातील जवळपास सगळ्याच जिल्ह्यांत सकल हिंदू आक्रोश रॅली काढण्यात आल्या. याद्वारे मुस्लिमांना इतके अपमानित केले गेले की जसे काही या देशात मुसलमान सगळ्यात मोठे देशद्रोही आहेत. जेव्हाजेव्हा देशात रक्ताची गरज भासली, तेव्हातेव्हा मुसलमान सगळ्यात आधी पुढे आला आहे. आता आम्हाला सांगितले जाते की हा देश तुमचा नाही, असे आझमी म्हणाले.
औरंगाबाद येथील २९ मार्च २०२३ रोजी संध्याकाळी ५ वाजता राम मंदिराजवळ तीन युवक मोटारसायकलवर आले. त्यांनी तिथे घोषणा दिल्या. त्या युवकांनी घोषणा दिल्या की तुम्हाला वंदे मातरम् म्हणावे लागेल. मी वंदे मातरम् म्हणू शकत नाही. कारण आम्ही फक्त अल्लाहला मानतो. आझमी यांच्या या वक्तव्यावर सभागृहात प्रचंड गदारोळ झाला. अध्यक्ष राहुल नार्वेकर यांनी सदस्यांना शांत करण्याचा प्रयत्न केला. मात्र, सदस्य ऐकण्याच्या मनःस्थितीत नव्हते.
अध्यक्षांनी अबू आझमी यांना लक्षवेधी सूचनेतील मुद्द्याच्या पलीकडे न बोलण्याचे निर्देश दिले. तरी आझमी बोलतच होते- त्यानंतर घटनास्थळी पोलीस आले आणि त्यांनी दोन्ही समूहातील युवकांना पांगवले. मात्र, संध्याकाळी पुन्हा सुमारे वीस युवक आले आणि पुन्हा घोषणा दिल्या की या देशात राहायचे असेल तर तुम्हाला वंदे मातरम् म्हणावे लागेल. आझमी बोलण्याचा प्रयत्न करत होते. पण सभागृहात गदारोळ सुरू राहिल्याने अध्यक्ष राहुल नार्वेकर यांनी सभागृहाचे कामकाज दहा मिनिटांसाठी तहकूब केले.
