आंतरराष्ट्रीय बुद्धिबळपटू विश्वनाथ आनंद याने एकाच वेळी २२ खेळाडूंसोबत मुकाबला केला. खरे तर त्याने राजकारणात यायला हवे. राजकारणात आम्हालाही एकाच वेळी अनेक विरोधकांशी मुकाबला करावा लागतो. त्यात काही तिरख्या चालीचे उंट असतात. काही अडीच घर चालणारे घोडे असतात. काही हत्ती असतात. सर्वांशी मुकाबला करावा लागतो, अशी मिश्किल प्रतिक्रिया मुख्यमंत्री एकनाथ शिंदे यांनी दिली.
स्वातंत्र्यदिनानिमित्त ठाण्याच्या कोरम मॉलमध्ये रोटरी क्लब, ठाणे मिडटाऊन आणि अपस्टेप एकेडमी यांच्या वतीने बुद्धिबळाचे प्रदर्शनीय सामने भरविण्यात आले होते. त्यात पद्मविभूषण बुद्धिबळपटू विश्वनाथ आनंद एकाच वेळी २२ प्रतिस्पर्धी मुलांशी खेळला. मुख्यमंत्री एकनाथ शिंदे यावेळी उपस्थित राहणार होते. परंतु कार्यबाहुल्यामुळे ते प्रत्यक्ष पोहोचू शकले नाहीत आणि त्यांनी आपला व्हिडिओ संदेश कार्यक्रमाच्या ठिकाणी पाठवला. त्यात त्यांनी ही माहिती दिली.
गेल्या वर्षभरापासून मला चेकमेट करण्यासाठी अनेकजण सातत्याने प्रयत्न करत आहेत. परंतु त्यांचे स्वप्न साकार होत नाही. त्यांनी आपली कितीही शक्ती पणाला लावली तरी जनतेचा विश्वास आणि पाठिंबा आमच्याबरोबर असल्यामुळे त्यांना यश येणार नाही असेही मुख्यमंत्री शिंदे म्हणाले.
२००५ साली बुद्धिबळाचे प्रशिक्षण देण्याचे काम अपस्टेप एकेडमी करत आहे. आतापर्यंत या संस्थेने २१ हजार २५२ मुलांना बुद्धिबळ खेळण्याचे प्रशिक्षण दिले आहे. या उपक्रमात २६ शाळा त्यांच्यासोबत सहकार्य करत आहेत. ४३ केंद्रांतून ही संस्था प्रशिक्षण देण्याचे काम करत आहे तर २१६ स्पर्धांचे आयोजनही या संस्थेने केले आहे.
(सर्व छायाचित्रेः गौरव कागडा)
