बिग बॉस मराठीच्या घरातील “चल रे भोपळ्या टुणूक टुणूक” या कॅप्टन्सी कार्यादरम्यान काल बरेच राडे बघायला मिळाले. बिग बॉसच्या घरातील काही सदस्यांनी नियमभंगही केले आणि याचमुळे बिग बॉसने सदस्यांची कडक शब्दांत केवळ कानउघाडणीच नाही केली तर विशाल, गायत्री आणि स्नेहा यांना त्याचे परिणामदेखील भोगावे लागले.
कुठलेही कार्य पार पाडताना वेगवेगळया युक्त्या वापरणे योग्यच असते. पण, ते पार पाडत असताना धक्काबुक्की होणे, कुठल्याही सदस्याला शारीरिक इजा होणे अतिशय निंदनीय आहे. बिग बॉसने जय, उत्कर्ष, विकास आणि आदिशला सक्त ताकीद दिली. विशाल निकमने काल बिग बॉसच्या घरातील प्रॉपर्टीचे नुकसान केले आणि त्यामुळे या कृत्याचा बिग बॉसने तीव्र शब्दात निषेध केला. प्रॉपर्टीचे नुकसान ही अक्षम्य चूक असल्याने विशालला बिग बॉसने पुढील आठवड्यात घराबाहेर होण्याच्या प्रक्रियेसाठी थेट नॉमिनेट केले.
ताकीद दिल्यानंतरही काही सदस्यांकडून नियमांची पायमल्ली करण्यात आली. हे कार्य खिलाडूवृत्तीने खेळायचे होते. पण तसे झाले नाही. आक्रमकता आणि धक्काबुक्की कार्यामध्ये केली गेली. ही वागणूक लज्जास्पद असून बिग बॉसने घरातील सर्व सदस्यांचा तीव्र शब्दांत निषेध केला. साप्ताहिक कार्य रद्द केले. गायत्री आणि स्नेहा रागावरचे नियंत्रण गमावून आक्रमक झाल्या. त्यामुळे सदस्यांना शारीरिक इजा होऊ शकत होती आणि बिग बॉसला हे अमान्य आहे. म्हणूनच त्या दोघींनाही पुढील आठवड्यात घराबाहेर होण्याच्या प्रक्रियेसाठी थेट नॉमिनेट केले.
आज बिग बॉसच्या घरात स्नेहा आणि जयची मस्ती बघायला मिळणार आहे. त्यांच्यामधील मैत्रीची चर्चा तर सगळीकडेच आहे. बघूया आज काय होणार ते? आज, घरामध्ये कॅप्टन कोण बनणार याची उत्सुकता सगळ्यांना लागून राहिली आहे. कारण, कालच्या भागामध्ये दाखविल्याप्रामाणे आज एका कार्याद्वारे घरातला कॅप्टन कोण हे आपल्याला समजणार आहे.
हे सगळे राडे घडत असतानाच मीरा गायत्रीसमोर तिचं मन मोकळं करताना दिसणार आहे. काल समोर आलेल्या प्रोमोनुसार मीरा गायत्रीसोमर तिची खंत व्यक्त करताना दिसणार आहे. ज्यामध्ये तिला अश्रू अनावर होतात आणि तिचा बांध तुटतो. मीरा गायत्रीसमोर ढसाढसा रडते. नक्की असं काय घडते? कोण मीराला दुखावतं? कोणाच्या वागण्याचे मीराला इतके वाईट वाटले असावे?
मीरा गायत्रीला म्हणते, “मला ऐकवायचे आहे… नाहीतर भांडायचे आहे… मला काहीतरी बोलायचे आहे.. नाहीतर.. नाही होणार माझ्याकडून. माझ्या मनामधून नाही निघणार… नाही सहन होत….”
बघूया नक्की काय घडतं ते.. आज रात्री बिग बॉसमध्ये.. कलर्स मराठीवर.
