भारतीय जनता पार्टीचे नेते आणि राज्याचे माजी मंत्री विनोद तावडे तसेच पंकजा मुंडे पक्षाच्या राज्यातल्या राजकारणातून जवळजवळ बाद झाले आहेत. पक्षाच्या राष्ट्रीय नेत्यांनी त्यांची वर्णी राष्ट्रीय कार्यकारिणीत लावतानाच त्यांच्यावर अनुक्रमे हरयाणा व मध्य प्रदेशचे प्रभारी म्हणून जबाबदारी दिली आहे. तावडे हरयाणाचे प्रभारी आहेत तर पंकजा मुंडे यांच्यावर मध्य प्रदेशची जबाबदारी टाकण्यात आली आहे.
भारतीय जनता पार्टीची नवी राष्ट्रीय कार्यकारिणी आज नवी दिल्लीत जाहीर करण्यात आली असून त्यातल्या राष्ट्रीय कार्यकारी समितीत महाराष्ट्रातून नितीन गडकरींसह पाच जणांचा समावेश करण्यात आला आहे. भाजपाच्या आक्रमक नेत्या चित्रा वाघ यांना यामध्ये स्थान मिळाले आहे.
केंद्रीय मंत्री पियुष गोयल, माजी मंत्री प्रकाश जावडेकर आणि विनय सहस्त्रबुद्धे हे इतर तीन सदस्य आहेत. विनोद तावडे, सुनील देवधर आणि पंकजा मुंडे यांना राष्ट्रीय सचिव म्हणून जबाबदारी देण्यात आली आहे. सुधीर मुनगंटीवार, आशिष शेलार आणि लड्डाराम नागवाणी यांना विशेष निमंत्रित म्हणून जागा देण्यात आली आहे. हिना गावित तसेच संजू वर्मा यांना राष्ट्रीय प्रवक्तेपद देण्यात आले आहे.
जमाल सिद्दीकी यांची अल्पसंख्याक मोर्चात वर्णी लागली आहे. माजी मुख्यमंत्री देवेंद्र फडणवीस, प्रवीण दरेकर, प्रदेशाध्यक्ष चंद्रकांत पाटील, पक्षाचे महाराष्ट्राचे प्रभारी सी. टी. रवी, सहप्रभारी ओमप्रकाश धुर्वे, जयभान सिंह पावैया यांचाही कार्यकारिणीत समावेश करण्यात आला आहे.
