राष्ट्रवादी काँग्रेसचे पिंपरीचे शहराध्यक्ष यांनी काल आपल्या समर्थकांसह शरद पवार यांच्या राष्ट्रवादीत प्रवेश केल्यामुळे विशाळगडाकडे रवाना होण्यापूर्वी राष्ट्रवादीचे अध्यक्ष अजित पवार यांनी आज थेट पिंपरी-चिंचवडचे सर्किट हाऊस गाठले. तेथे त्यांनी आपल्या समर्थकांची बैठक घेतली आणि पिपरी चिंचवडमध्ये पक्षांतर्गत सुरू झालेली पडझड थोपवण्याची जबाबदारी सध्यातरी माजी आमदार विलास लांडे यांच्यावर सोपवली असल्याचे कळते.
काल शरद पवार यांच्या उपस्थितीत अजय गव्हाणे यांच्याबरोबर पिंपरी परिसरातले जवळजवळ २० माजी नगरसेवकही त्यांच्या पक्षात दाखल झाले. त्यामुळे विधानसभेची ही जागा आता गव्हाणे लढवणार असल्याची चिन्हे दिसू लागली. पर्यायाने येथून इच्छुक असलेल्या शिवसेनेच्या उद्धव ठाकरे गटामध्ये तीव्र प्रतिक्रिया उमटली. विधानसभेत पवार गटाला मतदान करायचे की नाही, यावर निर्णय घेण्यासाठी हे कार्यकर्ते आज मुंबईत पक्षप्रमुख उद्धव ठाकरेंची भेट घेण्याची शक्यता आहे. या कार्यकर्त्यांच्या विरोधामुळेच काल खासदार अमोल कोल्हे यांनी आपला जनता दरबार पुढे ढकलला होता.
बैठकीनंतर अजित पवार यांनी ट्विट केले. गेल्या अनेक दशकांपासून माझ्यावर जीवापाड प्रेम करणारे पुणे आणि पिंपरी-चिंचवड शहरातील राष्ट्रवादी काँग्रेस पार्टीचे विश्वासू सहकारी, लोकप्रतिनिधी, पार्टी पदाधिकारी, माजी नगरसेवक यांच्याशी आज संवाद साधला. यावेळी शहरातील अनेक समस्या जाणून घेत, त्या सोडवण्यासाठी त्वरित पावले उचलण्याचे आश्वासन दिले. पक्षाच्या पुढील वाटचालीसंदर्भात चर्चा केली. पक्षाच्या कार्यकर्त्यांचा आणि पदाधिकाऱ्यांचा उत्साह आणि एकजूट आपल्याला आगामी काळात नक्कीच अधिक बळकट करेल, असा विश्वास पवार यांनी या ट्विटद्वारे केला.
