भारत सरकारच्या माहिती व प्रसारण मंत्रालयाच्या केंद्रीय संचार ब्यूरो, सोलापूरच्या वतीने आंतरराष्ट्रीय योग दिनानिमित ह.दे.प्रशालेच्या मुळे सभागृहामध्ये २० ते २२ जून दरम्यान बहुमाध्यम छायाचित्र प्रदर्शनाचे आयोजन करण्यात आले होते. याचा समारोप झाला असून तीन दिवसांत योग प्रेमी, योग साधक, नागरिक व विद्यार्थ्यांनी या प्रदर्शनास भेट दिली असल्याची माहिती क्षेत्रीय प्रचार अधिकारी अंकुश चव्हाण यांनी दिली.
प्राचीन व शात्रोक्त असेलेल्या भारतीय योगाची माहिती व जाणीव जागृती व्हावे या उद्देशाने प्रथमच हरिभाई देवकरण प्रशालेतील मुळे सभागृह येथे माहिती आणि प्रसारण मंत्रालयाच्या केंद्रीय संचार ब्युरो आणि जिल्हा व पोलिस प्रशासन यांच्यावतीने बहुमाध्यम प्रदर्शनाचे आयोजन करण्यात आले होते.
या प्रदर्शनात भारत सरकारच्या आयुष मंत्रालयाने निश्चित केलेल्या ४५ मिनिटाचे कॉमन योग प्रोटोकॉल अनुसार प्रार्थना, शिथिलीकरण, दंड स्थितीतील ताडासन, वृक्षासन, पादहस्तासन, अर्ध चक्रासन, त्रिकोणासन, बैठक स्थितीतील दंडासन, भद्रासन/बध्दकोनासन, वज्रासन, अर्ध उष्ट्रासन उष्ट्रासन, शशांकसन, उत्तान मंडूकासन, वक्रासन, पोटावर झोपून करावयाची आसने मकरासन, भुजंगासन, शलाभासन, पाठीवर झोपून करावयाची आसने सेतुबंधसर्वांगासन, उत्तान पादासन, अर्धहलासन, पवनमुक्तासन, शवासन, कपालभाती, प्राणायाम, ध्यान, संकल्प आणि शांति पाठ या विषयी सविस्तर छायाचित्र व मजकूर सहित माहिती होती. या प्रदर्शनाला सोलापूर शहरातील शंभर शाळेतील पाच हजाराहून अधिक शालेय विद्यार्थी व शिक्षकांनी भेटी दिल्या.
आंतरराष्ट्रीय योग दिवस हा आरोग्याची काळजी घेणेचे स्मरण करुन देतो. योगाच्या शास्त्रीय माहितीसाठी केंद्रीय संचार ब्युरोचे मल्टीमिडिया प्रदर्शन अत्यंत उपयुक्त असल्याचे मत महानगरपालिका आयुक्त शीतल तेली उगले यांनी केले. केंद्रीय संचार ब्युरोने मल्टीमिडिया चित्रप्रदर्शनाच्या माध्यमातुन लोकांना आरोग्याबाबत दक्ष केल्याची भावना पोलिस आयुक्त राजेंद्र माने यांनी व्यक्त केले. मल्टीमिडिया प्रदर्शन हे सर्वांसाठी अत्यंत उपयुक्त असून नेमकपणे माहिती देणारे दालन आहे, याचा सर्वांनी लाभ घ्यावा. असे आवाहन प्रभारी जिल्हाधिकारी तुषार ठोंबरे यांनी केले.
सकाळी १० ते सायंकाळी ६ वाजे पर्यंत हे प्रदर्शन सर्वांसाठी विनामुल्य खुले ठेवण्यात आले होते. तीन दिवसांत सोलापूर शहरातील नागरिक, शाळा आणि महाविद्यालयातील विद्यार्थ्यानी या प्रदर्शनाला मोठा प्रतिसाद दिला. यावेळी केंद्रीय संचार ब्युरोचे क्षेत्रीय प्रचार सहायक अंबादास यादव, कार्यालय सहायक जे एम हन्नुरे, स्काय विंग्स इवेंट एंड एंटरटेनमेंट चे संचालक योगी कोंडाबत्तीनी, सूरज जाधव, अनुराग जाधव, प्रथमेश गाडगे, शिवशंकर मंडप कांट्रेक्टर किरण गवळी यांनी प्रदर्शनाचे नियोजनासाठी परिश्रम घेतले होते.
