सुप्रसिद्ध पत्रकार व गायिका सुलोचना देवलकर यांच्या ‘स्वरसाधक’ या पुस्तकाचे प्रकाशन पुण्याच्या उन्मेष प्रकाशनातर्फे नुकतेच झाले. शास्त्रीय संगीताच्या क्षेत्रात आपली उत्तुंग कारकीर्द घडवणाऱ्या पंधरा दिग्गज कलावंतांच्या सांगितिक कारकिर्दीवर प्रकाश टाकणारे हे पुस्तक आहे. या सर्व दिग्गजांशी मुलाखतींच्या निमित्ताने साधलेला मनमोकळा संवाद यात मांडण्यात आला आहे. यातील कित्येक कलाकार आता हयात नसल्यामुळे तर या मुलाखती अधिकच मौलिक झाल्या आहेत.
पं. मल्लिकार्जुन मन्सूर, पं. जसराज, पं. वसंतराव देशपांडे, विदुषी किशोरी आमोणकर, पं. हरी प्रसाद चौरसिया, डॉ. सुशिलाताई पोहनकर, डॉ. शामला भावे, पं. अजय पोहनकर, पं. डी. के. दातार, पं. जयराम आचार्य, उस्ताद दिलशाद खान, बेगम परवीन सुलताना, अण्णा जोशी, विदुषी आरती अंकलीकर-टिकेकर आणि विदुषी कौशिकी चक्रवर्ती यांची व्यक्तिचित्रे या मुलाखतींमधून रेखाटण्यात आले आहे.
लेखिकेने मुलाखतींमधून या कलाकारांची संगीतसाधना, आयुष्याची क्षणचित्रे, करावा लागलेला संघर्ष, आलेले अनुभव, मिळालेले मानसन्मान यांसह कलाकारांचे शक्य तितका परिचय यानिमित्ताने मांडला आहे. संगिताच्या क्षेत्रात वाटचाल करू इच्छिणाऱ्या नव्या पिढीतील कलाकारांनी हे पुस्तक जरूर वाचावे आणि या कलावंतांच्या वाटचालीतून प्रेरणा घ्यावी व आपल्या संगीतसाधनेचे मार्ग शोधावेत, या हेतूनेच सुलोचना देवलकर यांनी हे पुस्तक लिहिले आहे.
या पुस्तकाला विख्यात गायिका आशा खाडिलकर यांनी प्रस्तावना लिहीली आहे तर अतिशय समर्पक असा शुभेच्छासंदेश सुप्रसिद्ध साहित्यिका माधवी कुंटे यांनी दिला आहे. हे पुस्तक अमेझॉनवर उपलब्ध आहे. पृष्ठे- १४३, किंमत- २०० रूपये. अमेझॉनवर रु. १९०/- हे पुस्तक मुंबईत विलेपार्ले पूर्वच्या जवाहर बुक डेपो तसेच मॅजेस्टिक बुक हाऊसमध्येही उपलब्ध आहे.
त्याची लिंक- https://www.amazon.in/dp/9385794779?ref=myi_title_dp
