सनातन संस्थेच्या रौप्य महोत्सवाच्या निमित्ताने सनातन संस्थेच्या वतीने पुण्यात येत्या २१ एप्रिलला सायंकाळी ५ वाजता महाराणा प्रताप उद्यान ते स्वातंत्र्यवीर सावरकर स्मारक डेक्कन अशा ‘सनातन गौरव दिंडी’चे आयोजन करण्यात आले आहे.
या गौरव दिंडीमध्ये ५०हून अधिक धार्मिक संस्था आणि संप्रदाय यांची पथके सहभागी होणार आहेत. समस्त हिंदूंनी जात, पक्ष, संप्रदाय विसरून एक सनातन धर्मप्रेमी हिंदू म्हणून या सनातन गौरव दिंडीमध्ये मोठ्या संख्येने सहभागी व्हावे तसेच दिंडीमध्ये सहभागी होणाऱ्या संघटनांनी स्वतःचे बॅनर, पथक, पथसंचलन या माध्यमांतून उत्स्फूर्तपणे सहभागी व्हावे, असे आवाहन सनातन संस्थेचे राष्ट्रीय प्रवक्ते चेतन राजहंस यांनी केले आहे.
पुण्यात पत्रकार भवन येथे आयोजित करण्यात आलेल्या पत्रकार परिषदेत ते बोलत होते. सनातन संस्थेचे चैतन्य तागडे, हिंदु जनजागृती समितीचे महाराष्ट्र राज्य संघटक सुनील घनवट, अधिवक्ता मंगेश जेजुरीकर आदी मान्यवर यावेळी उपस्थित होते.
सनातन गौरव दिंडी पायी निघणार असून दिंडीचा आरंभ महाराणा प्रताप उद्यान (भिकारदास मारुति मंदिर चौक, बाजीराव रस्ता) येथून होऊन बाजीराव रस्ता मार्गे लक्ष्मी रस्ता, अलका टॉकीज चौक ते स्वातंत्र्यवीर सावरकर स्मारक, डेक्कन असा तिचा प्रवास होईल. तेथेच तिची सांगता होईल. ‘सनातन गौरव दिंडी’त भगवे ध्वज, पारंपरिक पोशाख, विविध पथके, विविध देवतांच्या पालख्या अशाप्रकारे दिंडीचे स्वरूप असेल, असेही त्यांनी सांगितले.
१९९९मध्ये सनातन संस्थेची स्थापना झाली असून तेव्हापासून संस्थेचे अखंडपणे सनातन धर्माच्या प्रचाराचे कार्य आणि हिंदू एकतेचे कार्य चालू आहे. सनातन ही समाजाची आध्यात्मिक सेवा करणारी, श्रद्धासंवर्धन चळवळीतील एक अग्रणी संस्था आहे. संस्थेच्या वतीने समाजातील विविध वर्गांसाठी मानसिक तणाव नियंत्रण कार्यशाळा, शाळांमध्ये आध्यात्मिक प्रश्नमंजुषा, नैतिक मूल्यांविषयी व्याख्याने, समाजासाठी व्यसनमुक्तीसाठी प्रवचन, विनामूल्य आरोग्य शिबिर, मंदिर स्वच्छता आदी सामाजिक उपक्रमही राबवण्यात येतात, असेही राजहंस म्हणाले.
