महाराष्ट्र सरकारच्या मराठी भाषा विभागाने सन २०२२चे पुरस्कार जाहीर केले असून यंदाचा विंदा करंदीकर जीवनगौरव पुरस्कार प्रा. चंद्रकुमार नलगे यांना जाहीर करण्यात आला आहे.
मराठी भाषा मंत्री दीपक केसरकर यांनी काल याची घोषणा केली. यात विंदा करंदीकर जीवनगौरव पुरस्कारासह इतर सहा पुरस्कार जाहीर करण्यात आले.
जीवनगौरव पुरस्काराचे स्वरुप ५ लाख रुपये रोख, मानचिन्ह व मानपत्र असे आहे. प्रा. नलगे यांनी कथा कादंबरी, एकांकिका, चित्रपट लेखन इत्यादी विविध प्रकारात लेखन केले. त्यांच्या प्रकाशित ग्रंथाची संख्या ९० आहे, तर वयाची ज्येष्ठता ८७ वर्षं. त्यांना यापूर्वी विविध पुरस्कार, आदर्श शिक्षक तसेच राज्यशासनाचे अनेक पुरस्कार मिळाले आहेत.
यंदाचा श्री. पु. भागवत पुरस्कार ग्रंथाली प्रकाशनला जाहीर झाला आहे. ३ लाख रुपये रोख, मानचिन्ह व मानपत्र असे पुरस्काराचे स्वरूप आहे. प्रकाशित ग्रंथांची संख्या १ हजार २४०. सतत ४८ वर्षं कार्यरत असलेल्या ग्रंथालीने विविध विषयात प्रकाशने, पुस्तक प्रदर्शने, ग्रंथ चर्चा, वाचक चळवळ इत्यादी उपक्रम राबविले आहेत.
यंदाचा डॉ. अशोक रा. केळकर मराठी भाषा अभ्यासक पुरस्कार (व्यक्तींसाठी) डॉ. विठ्ठल वाघ यांना जाहीर करण्यात आला आहे. २ लाख रुपये रोख, मानचिन्ह व मानपत्र असे पुरस्काराचे स्वरूप आहे. डॉ. विठ्ठल वाघ यांनी वऱ्हाडी म्हणी, वऱ्हाडी बोलीचे संशोधन, देशविदेशात काव्यवाचनातून समाजप्रबोधनाचे कार्यक्रम, कविता, कांदबऱ्या, संशोधन अशा विविध साहित्यप्रकारात लेखन केले आहे.
यंदाचा कविवर्य मंगेश पाडगावकर मराठी भाषा संवर्धक पुरस्कार (व्यक्तींसाठी) द. ता. भोसले यांना जाहीर झाला आहे. २ लाख रुपये रोख, मानचिन्ह व मानपत्र असे पुरस्काराचे स्वरूप आहे. ग्रामीण बोलीचा शब्दकोश, लोपलेल्या सुवर्णमुद्रा ही बोली भाषेवरील महत्त्वाची पुस्तके, खेड्यातील मुला-मुलींच्या शिक्षणासाठी २५हून अधिक वर्ष ते कार्यरत आहेत.
यंदाचा डॉ. अशोक रा. केळकर मराठी भाषा अभ्यासक पुरस्कार (संस्थेसाठी) दिला जाणारा पुरस्कार महाराष्ट्र साहित्य परिषद पुणे यांना जाहीर झाला आहे. २ लाख रुपये रोख, मानचिन्ह व मानपत्र असे पुरस्काराचे स्वरूप आहे. संस्थेची स्थापना १९०६, मराठी भाषा आणि साहित्य यांच्या विकास व प्रचारासाठी कार्यरत, विविध साहित्य प्रकारातील ४०हून अधिक पुरस्कार या संस्थेद्वारे प्रदान करण्यात येतात. लेखन कार्यशाळा सारखे उपक्रम संस्थेमार्फत राबविण्यात येतात.
यंदाचा कविवर्य मंगेश पाडगावकर मराठी भाषा संवर्धक पुरस्कार (संस्थेसाठी) हा पुरस्कार कोकण मराठी साहित्य परिषद, रत्नागिरी यांना जाहीर झाला आहे. २ लाख रुपये रोख, मानचिन्ह व मानपत्र असे पुरस्काराचे स्वरूप आहे. संस्थेची स्थापना १९९९, मराठी भाषा साहित्य संस्कृतीसाठी कार्यरत साहित्य संमेलने, लेखक वाचक संवाद लेखन कार्यशाळा असे विविध उपक्रम या संस्थेमार्फत राबविण्यात येतात.
