बिग बॉस मराठीच्या घरामध्ये काल काही आगळवेगळं घडलं. चक्क बिग बॉसने त्यांचाच फोन घरामध्ये ठेवला आणि म्हणूनच या आठवड्याची थीम असणार आहे “टेलिफोन”.
जेव्हा जेव्हा या टेलिफोनची रिंग वाजेल तेव्हा घरातील सदस्यांना नवनवीन आव्हानांना सामोरं जावं लागणार आहे, असे बिग बॉसने कालच्या भागामध्ये घोषित केले आहे. काल घरामध्ये रंगले “चार्ज करायचा नाय” हे नॉमिनेशन कार्य, ज्यामध्ये अक्षय वाघमारे, सुरेखा कुडची, विशाल निकम, स्नेहा वाघ, संतोष चौधरी (दादुस), तृप्ती देसाई हे सदस्य घराबाहेर जाण्याच्या प्रक्रियेमध्ये नॉमिनेट झाले.
आज घरामध्ये रंगणार आहे “माझे मडके भरी” हे उपकार्य. घरातल्या भांड्यांची सुविधा जिंकण्यासाठी हे कार्य सोपवण्यात आले आहे. टीम ए आणि टीम बीमध्ये ही बाजी कोण मारणार? काय काय राडे होणार? कोणत्या टीमची मडकी फोडली जाणार? कोण कोणाशी पंगा घेणार? हे कळेल आजच्या भागात.
बिग बॉसच्या घरात आज सेलिब्रिशेनचा मूड दिसणार आहे. कारणही खास आहे. काल ४ ऑक्टोबरला घरातली सदस्य स्नेहा वाघचा जन्मदिवस. आणि त्याचनिमित्ताने सगळ्या सदस्यांनी तिचा वाढदिवस एकत्र येऊन साजरा केला. तृप्ती देसाई यांनी सगळ्यांच्यावतीने तिला छानसं गिफ्टही दिलं.
बिग बॉसच्या घरामध्ये सणासुदीच्या दिवशी, कोणाचा वाढदिवस असेल तर गोडधोड पदार्थ खाण्याची संधी सदस्यांना मिळते आणि त्याचा आनंद या सदस्यांच्या चेहर्यावर दिसून येतो. अजून काय काय धम्मालमस्ती केली गेली हे बघा आजच्या भागात, रात्री कलर्स मराठीवर!
