आपल्या हुजरेगिरीमुळे बावचळलेले राऊत आता भोक पडलेल्या फुग्याला एवढे का घाबरतायेत? असंतर नाही की राणे साहेबांचा फुगा तुमच्याविषयीच्या गुपितांनी भरलेला आहे. तो फुटला तर तुमच्या तिन्ही धन्यांचा तुमच्यावरचा विश्वास उडून जाईल, अशी प्रतिक्रिया भारतीय जनता पार्टीचे नेते आमदार गोपीचंद पडळकर यांनी व्यक्त केली आहे.
केंद्रीय सूक्ष्म, लघु व मध्यम उद्योग मंत्री नारायण राणे यांच्या जन आशिर्वाद यात्रेला मिळत असलेल्या प्रतिसादामुळे खवळलेले शिवसेनेचे नेते खासदार संजय राऊत यांनी राणे यांचा उल्लेख भोक पडलेला फुगा, असा केला होता. त्यावर पडळकर यांनी ही प्रतिक्रिया दिली.
राणे साहेबांवरील सुडाची कारवाई म्हणजे कायद्याची कारवाई असे संबोधता मग पोलिसांना त्यांच्या आई-बहिणीवरून अत्यंत घाणरेड्या शब्दात शिव्या घालणाऱ्या वरूण देसाईला अटक का होत नाही? हेच का तुमचं महाराष्ट्र मॉडेल…?, असा सवालही त्यांनी केला.
ज्या बाळासाहेबांनी आयुष्यभर काँग्रेसी विचारांचा विरोध केला आणि शरद पवारांचे नेहमी मार्मिक शब्दाने पितळ उघड पाडले, पण तुम्ही आज त्यांचाच उधोउधो करणे म्हणजे बाळासाहेबांच्या हिंदुत्वाच्या पाठीत खंजीर खुपसण्याचा प्रकार नाही का? हिंदु समाजाला सडलेला म्हणणारा शर्जिल उस्मानी उजळ माथ्यानं महाराष्ट्रात येऊन फिरतो आणि त्यावर कारवाई करण्याऐवजी सत्तेच्या लालसेपोटी तुमचे हात थरथर कापतात. मला बाळासाहेबांच्या दैनिकाचे ‘बाबरनामा’त रूपांतर करणाऱ्याला हेच विचारायचे आहे की, त्यावेळेस यांची आस्मिता कुणाच्या पायापुढे लोटांगण घालते, असेही पडळकर म्हणाले.
माननीय संजय राऊत, कमरेचं सोडून डोक्याला बांधून अग्रलेख लिहण्याच्या विकृतीला बांध घाला, अन्यथा ‘तुमच्या हम करे सो..’ कायद्याच्या फुग्याला देशाच्या कानाकोपऱ्यात भोकं पडतील, असा इशाराही त्यांनी दिला.
